Desvelan os xogos que incluirá Stadia Pro en xaneiro

A plataforma de xogo na nube de Google tivo unha estrea irregular, que levou a que os subscritores de Stadia Pro recibisen un total de 4 xogos como recompensa (Destiny 2, Samurai Shodown, Farming Simulator 19 e Tomb Raider), e semella que esta fórmula para compensar o pouco que ten aínda que ofrecer a plataforma continuará nos vindeiros meses, pois veñen de anunciar que a partires do 1 de xaneiro os subscritores recibirán os xogos Rise of the Tomb Raider: 20 Year Celebration (o segundo xogo da nova serie de Lara Croft) e o xogo rítmico Thumper (título independente de hai máis de 3 anos).
Tomb Raider: Definitive Edition poderá reclamarse ata o 31 de decembro, e Destiny 2: The Collection, Samurai Shodown e Farming Simulator 19 ata o remate de xaneiro, dando a impresión de que Stadia Pro terá un funcionamento moi semellante a Xbox LIVE Gold e PlayStation Plus, de xeito que permitirá incorporar xogos á colección dos usuarios mentres paguen a subscrición, aos que perderán o acceso se deixan de pagar mensualmente. Tamén parece que Google seguirá a mesma estratexia de ofrecer grandes xogos aos seus subscritores só en momentos puntuais, de xeito que haberá que afacerse a títulos pouco relevantes (na liña de Thumper), pois non podemos esquecer que Stadia Pro non se centra nos xogos incluídos, senón na potencia que ofrece ao xogador á hora de xogar na nube (sendo unha interesante opción para quen queira gozar de xogos en resolución 4K sen ter que adquirir unha consola ou ordenador de alta gama).