Afastándose de solucións de realidade aumentada que buscan interactuar con numerosos contornos para revolucionar o xeito de relacionarnos co mundo, dende Lenovo son máis conscientes do estado desta tecnoloxía e presentan as lentes conectadas ThinkReality A3, que buscan basicamente conectarse a un PC ou a certos smartphones de Motorola a través de USB-C para poder presentar ao usuario ata 5 pantallas virtuais coas que poder traballar.
Estas lentes están equipadas cun procesador Qualcomm Snapdragon XR1, pantallas estereoscópicas Full HD e unha cámara de 8 Mpíxeles para rexistrar o contorno. Aínda que esta tecnoloxía pode aplicarse a distintos escenarios, o seu desenvolvemento inicial limítase a ofrecer monitores virtuais que poidan empregarse dende Windows, conseguindo así un escenario inmersivo e privado no que poder desenvolver tarefas de produtividade.
De optar por conectar as lentes a smartphones, a orientación sería diferente, pois podería servir para usos como os que xa están a desenvolverse con HoloLens e outras lentes de realidade aumentada, ou sexa, para contornos industriais, laboratorios, hospitais… lugares nos que a realidade aumentada pode axudar para achegar guías de uso e outra información de utilidade para desenvolver traballos moi específicos, e que precisamente son os ámbitos nos que esta tecnoloxía vai avanzando a un ritmo máis pausado, xa que require de moita investigación e desenvolvemento para desatar todo o seu potencial.
Estas novas lentes de realidade aumentada de Lenovo comercializaranse a partir de mediados de ano.
Vídeo de presentación das Lenovo ThinkReality A3
