Samsung presentou finalmente os seus novos móbiles encartables, que supoñen un importante paso na consolidación nesta categoría de produto na que a compañía surcoreana está a converterse no único axente de peso no mercado, contrastando co panorama que se prevía para 2020, que estaba chamado a ser o ano dos encartables, pero a realidade demostrou que esta tecnoloxía precisaba de maior tempo de maduración.
No caso do Samsung Galaxy Z Fold3 5G as novidades son bastante evidentes, xa que incorpora resistencia IPX8, oculta a súa cámara frontal baixo a pantalla encartable (a menos utilizada do dispositivo, polo que pode permitirse arriscar neste aspecto) e soporta unha versión especial do S Pen, convertendo o Z Fold3 no que para moitos sería o Note ideal.
A nivel de especificacións, falamos dun móbil cunha pantalla principal Dynamic AMOLED 2X de 7,6 polgadas cunha velocidade de refresco adaptable de 120 Hz; cunha pantalla externa Dynamic AMOLED 2X de 6,2 polgadas cun refresco adaptable de 120 Hz; con cámara traseira tripla con sensores de 12 Mpíxeles e distintos angulares (incorporando estabilización óptica no teleobxectivo), cámara frontal na pantalla externa de 10 Mpíxeles e unha curiosa cámara frontal de 4 Mpíxeles na pantalla principal (que semella pensada simplemente para poder realizar videoconferencias, xa que para disparar fotografías permite empregar a cámara traseira); 12 GB de RAM e 256/512 GB de almacenamento interno UFS 3.1; e batería de 4.400 mAh con carga rápida con ou sen cable e carga inversa sen fíos de 4,5 watts.
Pola súa banda, o Samsung Galaxy Z Flip3 5G tamén incorpora resistencia IPX8 e incrementa o tamaño da súa pantalla externa para dotala de máis capacidades interactivas, de xeito que non é preciso abrir o teléfono para atender notificacións, controlar a reprodución multimedia ou incluso disparar selfies.
En ambos móbiles mellorouse substancialmente a bisagra, que cada vez pon máis difícil que se coe po e outras partículas no seu interior, e soporta 200.000 pregues, e tamén achega experiencias innovadoras grazas ao modo Flex nos que as aplicacións poden interpretar a pantalla dobrada como dúas pantallas separadas.
As especificacións do Galaxy Z Flip3 5G son máis discretas que as do seu irmán maior, cunha pantalla principal Full HD+ Dynamic AMOLED 2X de 6,7 polgadas cun orificio para unha cámara de selfies de 10 Mpíxeles; a cámara traseira dual ten sensores principal e ultra grande angular de 12 Mpíxeles xunto a unha pantalla Super AMOLED de 1,9 polgadas cunha resolución de 512 x 260 píxeles; 8 GB de RAM e 128/256 GB de almacenamento interno UFS 3.1; e batería de 3.300 mAh con carga rápida de 15 watts con cable, 10 watts sen fíos e carga inversa sen fíos de 4,5 watts.
O Galaxy Z Fold3 5G chegará ás tendas o 27 de agosto a un prezo que parte dos 1.809 euros, mentres que o Galaxy Z Flip3 5G parte dos 1.059 euros, de xeito que ambos móbiles son lixeiramente máis competitivos que a súa versión anterior. Estes móbiles poden reservarse dende hoxe, quen os adquira anticipadamente recibirán un ano de protección Samsung Care+, que cubre danos accidentais, incluíndo a substitución da pantalla frontal.
Vídeo promocional dos novos encartables de Samsung
