EA renova o cliente dos seus xogos para PC

Durante máis dunha década Electronic Arts utilizou Origin como plataforma para os seus xogos para PC, sen conseguir que esa marca gañase forza, polo que decidiron aparcala e pasarlle o relevo á nova EA app, unha aplicación para ordenadores persoais que vén de superar a súa fase de probas aberta e que en breve substituirá a Origin.
Esta nova aplicación será a plataforma principal para PC dos xogos de Electronic Arts, asegurando a compañía que é o seu cliente para PC máis rápido e lixeiro ata o momento, xa que no seu deseño buscaron a simplicidade, á vez que tamén conta con funcións como permitir as descargas automáticas de xogos e actualizacións en segundo plano, para que os xogos estean listos para xogarse cando se queiran.
Aínda que xa podemos descargar a nova aplicación, dende EA adiantan que van convidar en breve aos xogadores que actualmente empregan Origin para que muden de aplicación e así gozar de todos os contidos que tiñan previamente na nova aplicación.
Este cambio polo momento limítase a PC, ou sexa, que os usuarios de macOS deberán continuar a usar Origin para acceder aos seus xogos de EA.