Xbox Game Pass supón preto do 18% do negocio de Xbox

Microsoft leva tempo apostando firmemente polo servizo de subscrición de videoxogos Xbox Game Pass, que por unha cantidade fixa mensual ofrece un completo catálogo de xogos que poden xogar en consola e incluso a través da nube, e aínda que normalmente non sabemos moitos detalles de como funcionan este tipo de servizos a nivel comercial, a operación de compra de Activision-Blizzard levou a que a Xbox tivese que divulgar en Brasil interesante información do Game Pass.
Un dos datos desvelados por Microsoft sería os ingresos de Xbox durante 2021, detallando que a división de xogos de Microsoft ingresou 16.282 millóns de dólares, dos que 3.701 millóns corresponderían a hardware e 12.581 a xogos e servizos, destacando entre estes últimos que o Game Pass facturaría 2.900 millóns de dólares.
Temos así que preto do 18% dos ingresos de Xbox corresponderían ao Xbox Game Pass, polo que é unha proporción do volume de negocio moi importante para un servizo innovador que hai uns anos pareceríanos imposible.
Estímase que actualmente Xbox Game Pass conta con 25 millóns de subscritores, confirmándose que esa fórmula de consumo de videoxogos resulta moi axeitada para un perfil de xogador moi concreto, complementando ao modelo de negocio tradicional de grandes producións que precisan de fortes vendas no seu lanzamento para resultar rendibles (e que serían inviables baixo un formato de subscrición).