Steam supera os 30 millóns de xogadores simultáneos

O número de xogadores en liña en Steam medraba de xeito bastante constante, ata que chegou a pandemia, o que provocou a superación dos 20 millóns de usuarios simultáneos na plataforma, mantendo o seu crecemento nos meses nos que tendemos a estar no fogar, acusándose notablemente a caída da actividade nos meses de verán.
Este ano puidemos ver como en marzo a plataforma chegou moi preto dos 30 millóns de usuarios simultáneos, cantidade que caeu ata os 26,77 millóns en agosto, pero a chegada do mal tempo fixo recuperar a senda do crecemento, rexistrándose importantes picos durante as fins de semana ata que o pasado domingo rexistráronse ata 30.032.005 xogadores simultáneos en Steam, superando por primeira vez os 30 millóns de usuarios simultáneos, deixando claro que o xogo en liña non para de medrar, superando amplamente as marcas acadadas durante o confinamento.
Os títulos que máis estarían a xogarse a pasada fin de semana serían Counter-Strike: Global Offensive (que superou o millón de xogadores simultáneos), Dota 2 (superou os 752 mil usuarios simultáneos), Lost Ark (sobrepasou os 214 mil xogadores simultáneos), Apex Legends (superou os 325 mil usuarios simultáneos) e PUBG: Battlegrounds (superou os 442 mil xogadores simultáneos).