Spotify actualiza a súa aplicación para Apple TV

Spotify anunciou unha versión redeseñada da súa aplicación para Apple TV, «reconstruída desde cero para ofrecer unha experiencia máis rápida, intelixente e visual». A versión para tvOS incorpora varias funcións xa presentes na aplicación móbil, pero as principais novidades son a chegada dos videopodcasts e dos videoclips musicais.
A nova versión xa pode descargarse desde a App Store, e os dispositivos con actualizacións automáticas activadas recibirana de aquí a mediados de novembro. Os usuarios levaban tempo reclamando melloras tras anos de queixas en foros como Reddit pola navegación confusa e a falta de opcións dispoñibles noutras plataformas, como Google TV. Esta actualización parece dar resposta a esas críticas.
A reprodución de videoclips xa chegou a 97 mercados de todo o mundo cun catálogo inicial reservado a subscritores de Spotify Premium. Estes vídeos poden verse facilmente mediante a opción cambiar a vídeo, que aparece cando unha canción ten videoclip asociado. Os podcasts con versión en vídeo funcionarán de xeito semellante, con opción de axustar a velocidade de reprodución.
A actualización tamén incorpora outras funcións populares da aplicación móbil, como a xestión da cola de reprodución, a sincronización continua entre dispositivos, a visualización de letras de cancións e o acceso a Spotify DJ, o sistema con intelixencia artificial que suxire o que escoitar a continuación. Ademais, será posible controlar a reprodución no Apple TV desde o móbil ou a tableta mediante Spotify Connect.