PS Plus incorpora en xullo Avatar: Frontiers of Pandora entre outros xogos

Sony anunciou os títulos que se incorporan durante xullo ao catálogo de PlayStation Plus para os subscritores das modalidades Extra e Premium. A selección está encabezada por Avatar: Frontiers of Pandora e Rise of the Ronin, aos que se suman propostas como Firefighting Simulator: Ignite, Mighty Morphin Power Rangers: Rita’s Rewind ou Citizen Sleeper 2: Starward Vector. Os usuarios de PlayStation Plus Premium tamén recibirán dous clásicos de PlayStation 2: Psi-Ops: The Mindgate Conspiracy e Fahrenheit.
Avatar: Frontiers of Pandora (PS5) propón unha aventura de acción en primeira persoa ambientada na Fronteira Occidental de Pandora. Os xogadores encarnan un Na’vi criado pola corporación militar RDA que, tras recuperar a liberdade, deberá redescubrir a súa identidade e colaborar con outros clans para defender o planeta fronte á ocupación humana.
Rise of the Ronin (PS5), desenvolvido por Team Ninja, traslada a acción ao Xapón de 1863, nun período marcado polo declive do shogunato Tokugawa e a chegada das potencias occidentais. O RPG de mundo aberto combina exploración e combates para permitir aos xogadores definir o destino dun guerreiro sen nome nun momento decisivo da historia do país.
Tamén se incorpora Firefighting Simulator: Ignite (PS5), unha simulación centrada no traballo dos bombeiros nunha cidade estadounidense, con misións cooperativas para ata catro xogadores, física avanzada e gráficos desenvolvidos con Unreal Engine 5.
O catálogo complétase con Mighty Morphin Power Rangers: Rita’s Rewind (PS5, PS4), un beat ‘em up en dúas dimensións no que Robo Rita e Rita Repulsa alteran a liña temporal para impedir a creación dos Power Rangers; Dying Light (PS4), o coñecido xogo de supervivencia fronte a zombis; Citizen Sleeper 2: Starward Vector (PS5), un RPG narrativo de ciencia ficción baseado en mecánicas inspiradas nos xogos de mesa; e Snow Bros. Wonderland (PS5), que recupera a clásica franquía cunha nova presentación isométrica en tres dimensións.
Os subscritores de PlayStation Plus Premium recibirán ademais dous clásicos. Psi-Ops: The Mindgate Conspiracy (PS5, PS4) recupera o título de acción protagonizado polo axente Nick Scryer, capaz de utilizar poderes psíquicos como a telecinese ou o control mental para superar combates e crebacabezas. Pola súa banda, Fahrenheit (PS5, PS4), coñecido internacionalmente como Indigo Prophecy, devolve á actualidade o thriller interactivo de Quantic Dream, no que os xogadores deberán investigar unha serie de asasinatos con compoñentes sobrenaturais desde distintas perspectivas.