Logo de concluír o prazo de inscrición o pasado 6 de xullo, cando se recibiron máis de 60 propostas, un total de 30 proxectos foron seleccionados para participar na 1ª Edición de startTIC, a Incubadora de Alta Tecnoloxía promovida polo Consorcio da Zona Franca de Vigo, a Cámara de Comercio de Pontevedra, Vigo e Vilagarcía de Arousa e o Centro Tecnolóxico Gradiant.
Segundo se fai saber no balance, a maior parte das iniciativas seleccionadas son de Vigo (14), aínda que hai doutras zonas da área viguesa como Cangas, Tui, Marín ou Mos; do resto de Galicia: A Coruña, Lugo, Pontevedra, Ourense, Santiago, e Vilagarcía; doutros puntos de España como León; e un proxecto procedente de Portugal.
Na maioría dos casos trátase de proxectos de recente creación ou en fases temperás de desenvolvemento, aínda que destaca tamén a presenza de novas firmas innovadoras (startups) e proxectos constituídos que supoñen case un terzo do total.
Destacaron as contribucións de desenvolvemento de software (aplicacións, videoxogos, etc.), procesamento de datos, aloxamento e portais web, que aplican unha ampla gama de tecnoloxías TIC (Tecnoloxías da Información e a Comunicación), pero entre as que sobresae por enriba de todas a intelixencia artificial como fío transversal da maior parte das iniciativas seleccionadas. Así, 8 de cada 10 proxectos aplican algunha das súas modalidades, desde IA xenerativa ata axentes autónomos.
Así mesmo un 20% dos proxectos decántanse por tecnoloxías de ciberseguridade e soberanía do dato, que dan solucións para protección de infraestruturas críticas ata deepfakes.
Completan o mapa de tecnoloxías as iniciativas baseadas na Internet das Cousas (IoT), robótica e edge computing.
Para a selección dos 30 proxectos polo Comité Técnico de startTIC, que accederán ao programa de incubación a partir de setembro, tivéronse en conta criterios como a aliñación cos sectores TIC de referencia, o seu carácter innovador, o grao de madureza ou viabilidade, ou a súa capacidade de contribuír á dinamización do tecido empresarial, a xeración de emprego e o desenvolvemento tecnolóxico en Galicia.
A incubadora ten como obxectivo impulsar proxectos tecnolóxicos innovadores e acompañalos no seu desenvolvemento, validación e chegada ao mercado, apostando por iniciativas innovadoras e aliñadas coas tendencias actuais, que poderán desenvolver as súas propostas de alta tecnoloxía para aplicar nos sectores clave da economía galega.
Un 20% dos proxectos elixidos desenvolven solucións de IA e sensórica con aplicación no ámbito marítimo, desde pesca e acuicultura ata comunicacións portuarias. Outros dos grandes sectores de aplicación na nosa área, son as propostas de automoción e mobilidade conectada. Por último, destacan as propostas relacionadas co medio rural, que aplican propostas de dixitalización agrícola, pero tamén para unha necesidade cada vez máis perentoria, a prevención de incendios forestais.
A partir de agora, os 30 proxectos participarán nun programa intensivo de incubación de 6 meses que comezará en setembro no Parque de Zona Franca en Bouzas, localización temporal ata que finalicen as obras do VgoTIC Global HUB de López Mora, co obxectivo de validar as súas hipóteses de partida no menor tempo e o menor custo, coa construción dun produto mínimo viable (MVP) funcional, que permita a súa transformación definitiva en proxectos sólidos. Terán acceso a asesoramento tecnolóxico personalizado, obradoiros prácticos, reunións individuais con expertos tecnolóxicos, e acceso ás infraestruturas e equipamentos de startTIC, especialmente os seus laboratorios dedicados.
