Ferrol converterase no punto de partida de POV: do Camiño ao contido, unha iniciativa posta en marcha pola Xunta de Galicia que busca combinar a experiencia do Camiño de Santiago coa formación en creación de contido dixital.
O programa, dirixido a mozos e mozas de entre 18 e 29 anos residentes en calquera punto do territorio nacional, desenvolverase do 1 ao 6 de setembro ao longo do Camiño Inglés.
Durante esas seis xornadas, as persoas participantes recibirán formación específica para aprender a crear contidos para as redes sociais, ao tempo que narrarán en primeira persoa a súa experiencia como peregrinos ao longo da ruta.
A iniciativa, de carácter gratuíto, inclúe comidas e aloxamento ao longo das seis etapas que completarán os participantes.
Segundo lembra o Concello de Ferrol o nome do proxecto (POV: do Camiño ao contido) xoga co termo dixital POV (Point Of View) e o contexto galego e cultural do Camiño de Santiago. “Entre os obxectivos desta novidosa iniciativa está fomentar a creatividade e a expresión persoal, e a través dela, os mozos e mozas aprenderán a contar historias a través de distintos formatos dixitais e a crear contido profesional a través de ferramentas e técnicas básicas”, engade o Concello, recordando que o programa tamén busca impulsar o uso consciente das redes, reforzar o traballo en equipo e poñer en valor a identidade galega e a contorna local, integrando o patrimonio cultural, o comercio tradicional e as historias humanas do Camiño como parte esencial do contido a crear.
A Xunta de Galicia pon a disposición un total de 17 prazas e o prazo de inscrición estará aberto ata o 31 de xullo.
A inscrición pode realizarse a través da web municipal de Ferrol e tamén se poderá realizar de xeito presencial a través do Rexistro do Concello de Ferrol. A selección farase por rigorosa orde de inscrición.
Cómpre destacar que todos aqueles que sexan seleccionados deberán participar de xeito obrigatorio nunha sesión on line que terá lugar o venres 28 de agosto de 10.00 a 14.00 horas.
As persoas interesadas en obter máis información sobre POV: do Camiño ao contido, poden escribir a xuventude@ferrol.es ou chamar ao 981 944 250.
