O CDTI Innovación, a axencia estatal de innovación do Ministerio de Ciencia, Innovación e Universidades (MICIU), rematou xullo lanzando a publicación avanzada da apertura en outubro de 2026 da convocatoria Innterconecta STEP 2026, cunha dotación estimada de 138 millóns de euros en subvencións co-financiadas con fondos do Fondo Europeo de Desenvolvemento Rexional (FEDER).
O CDTI Innovación publica esta información con antelación ao comezo do prazo formal de solicitude “para que as empresas e organismos de investigación poidan deseñar e madurar as súas propostas con tempo suficiente, en liña co compromiso do organismo coa previsibilidade e a calidade técnica dos proxectos”, sinala.
Innterconecta STEP é o programa de subvencións do CDTI Innovación orientado a financiar proxectos de I+D en cooperación liderados por empresas e centrados nas tecnoloxías estratéxicas fundamentais definidas pola Plataforma de Tecnoloxías Estratéxicas para Europa (STEP), establecida polo Regulamento (UE) 2024/795.
Os proxectos deberán desenvolverse nalgún dos tres ámbitos tecnolóxicos STEP:
-Tecnoloxías dixitais, incluídas as vinculadas ao Programa Estratéxico da Década Dixital para 2030, que comprenden intelixencia artificial, computación avanzada, ciberseguridade, microelectrónica e semiconductores, entre outras.
-Tecnoloxías limpas e eficientes no uso de recursos, aliñadas coa ambición industrial de cero emisións netas, tal e como se definen no Regulamento sobre a Industria de Cero Emisións Netas, incluíndo enerxías renovables, almacenamento enerxético, hidróxeno e industria verde.
-Biotecnoloxía, como vector transversal para saúde, industria e resiliencia, incluíndo os medicamentos da lista da Unión de medicamentos esenciais e os seus compoñentes.
A convocatoria introduce como novidade unha reserva orzamentaria de 10 millóns para proxectos no ámbito da saúde das mulleres.
A convocatoria 2026 incorpora a Illes Balears como novidade no mapa de territorios elixibles, respecto á edición de 2025.
O orzamento estimado de 138 millóns de euros distribúese entre as nove comunidades autónomas participantes, con Galicia concentrando a maior dotación: 51.000 euros. Os orzamentos teñen carácter estimado e poderán variar ata a publicación oficial da convocatoria en función da dispoñibilidade definitiva de fondos FEDER en cada comunidade.
A convocatoria 2026 mantén o esquema estrutural da edición 2025 recentemente resolta, con subvencións en concorrencia competitiva, con intensidades que poden alcanzar o 65% do orzamento elexible para gran empresa, o 75% para mediana empresa e o 80% para pequena empresa, en función de se a actividade está clasificada como investigación industrial ou desenvolvemento experimental. Os proxectos deberán contar cun orzamento de entre 1 e 4 millóns de euros, cun mínimo de 175.000 euros por empresa participante.
Poderán concorrer agrupacións de entre dúas e seis empresas, sen personalidade xurídica propia, coa participación obrigatoria de, polo menos, unha peme.
A convocatoria 2026 chega co programa xa consolidado tras a súa primeira edición en 2025, resolta en xuño de 2026, que aprobou 100 proxectos en consorcio coa participación de 388 entidades, o 64,7% delas pemes. A subvención concedida ascendeu a 146,9 millóns de euros, o 98% do orzamento dispoñible, mobilizando un orzamento elixible total de 231,5 millóns de euros. Os proxectos aprobados distribuíronse entre os tres ámbitos STEP: tecnoloxías dixitais (62,1% dos proxectos), biotecnoloxía (21,6%) e tecnoloxías limpas e eficientes (16,2%), cunha taxa media de subcontratación a centros xeradores de coñecemento do 14,8%, por enriba do mínimo do 10% esixido pola convocatoria.
