Refactor Games, un estudio fundado en 2022 por Nathan Burba (cofundador de Survios), despediu arredor do 85 % do seu cadro de persoal apenas dous meses despois do lanzamento de FIFA World Cup: Launch Edition, o videoxogo oficial da Copa do Mundo desenvolvido para Netflix, considerado unanimemente como un título indigno de distribuírse baixo a marca FIFA, que EA Sports situara nunha posición de referencia e que agora están a arrastrar polo chan.
O propio Burba confirmou a GamesBeat que a empresa prescindiu do 85 % dos seus empregados, mentres que Insider Gaming cifra o impacto nuns 80 traballadores. Segundo este último medio, a decisión produciuse despois de que Delphi Interactive, editora do xogo e propietaria parcial do estudio, retirase o financiamento do proxecto. Nin Burba nin os responsables de Delphi ofreceron máis detalles sobre os motivos da decisión.
As fontes consultadas por Insider Gaming aseguran que os empregados foron informados durante unha reunión xeral celebrada o pasado 31 de xullo. A retirada do financiamento tería sido inmediata, polo que os despedidos non recibiron indemnización. Ese mesmo día, que coincidía coa xornada de pagamento das nóminas, percibiron o seu último salario antes de abandonar a empresa.
Varios dos afectados fixeron pública a súa situación a través de LinkedIn, onde explicaron que os despedimentos se produciron sen aviso previo. Algunhas fontes tamén sinalan que Refactor Games pretende reorganizarse e manter a actividade, coa intención de volver contratar parte do persoal para futuros proxectos. Con todo, antigos empregados aseguran que esa posibilidade non foi mencionada na reunión na que se comunicaron os cesamentos.
Cando naceu en 2022, Refactor Games anunciara a súa intención de desenvolver un simulador de fútbol americano capaz de competir con Madden NFL, apostando por un modelo sen entregas anuais e cun amplo sistema de personalización e modificación por parte da comunidade. Nalgún momento posterior, o estudio acabou colaborando con Delphi Interactive e Netflix no desenvolvemento do xogo oficial do Mundial de fútbol.
