Microsoft anunciou a primeira vaga de incorporacións de agosto ao catálogo de Xbox Game Pass, cunha selección de xogos que inclúe estreas desde o primeiro día, actualizacións de títulos xa dispoñibles e o acceso anticipado á beta aberta de Gears of War: E-Day para os subscritores de Game Pass Ultimate e PC Game Pass.
O principal reclamo é a beta aberta de Gears of War: E-Day, que comezará o 6 de agosto en acceso anticipado para os usuarios destas modalidades de subscrición. Permitirá probar Horde Siege, un novo modo cooperativo PvE que amplía a clásica supervivencia por ondas da saga con mapas de maior tamaño, máis xogadores e enfrontamentos de maior escala.
Dende hoxe están dispoñibles Heretic + Hexen para a nube, consola, consolas portátiles e PC. A reedición reúne os dous clásicos dos xogos de acción en primeira persoa ambientados na fantasía escura, cunha restauración que incorpora melloras de accesibilidade e compatibilidade con máis plataformas e idiomas.
Hoxe tamén chega Beast of Reincarnation, dispoñible desde o seu lanzamento en Game Pass para a nube, Xbox Series X|S, consolas portátiles e PC. Desenvolvido por Game Freak, combina combate en tempo real e por quendas nun RPG de acción protagonizado por Emma e o seu can Koo.
O 6 de agosto sumarase Monsters are Coming!, un roguelite de defensa no que hai que protexer unha cidade en constante movemento fronte a vagas de inimigos, mentres que PowerWash Simulator 2 estrearase tamén esa xornada con novos escenarios, ferramentas e opcións multixogador.
O 11 de agosto incorporarase Bounty Star, unha aventura de acción en terceira persoa que combina combates con mechas, personalización, agricultura e construción de bases. A mesma data chegará Date Everything!, un simulador de citas ambientado nun fogar con cen personaxes completamente dobrados aos que é posible conquistar, así como a actualización Into The Abyss para Grounded 2, que amplía significativamente o contido do xogo.
O 12 de agosto será a quenda de Ball x Pit, un título que mestura mecánicas de romper ladrillos, supervivencia roguelite e construción de bases.
O 13 de agosto incorporaranse varias novidades. Cricket 26 ofrecerá un novo modo carreira de xestión, unha versión ampliada das Ashes e opcións para crear equipos personalizados. Ese mesmo día tamén estarán dispoñibles MIO: Memories in Orbit, unha aventura metroidvania ambientada nun mundo dominado pola natureza e os robots, e Sandustry, un xogo de automatización e explotación de recursos con escenarios totalmente destrutibles que chega desde o primeiro día a PC mediante Game Pass.
A primeira vaga de novidades pecharase o 18 de agosto coa chegada de Egging On, unha proposta de plataformas na que o xogador controla un fráxil ovo que debe superar numerosos obstáculos para escapar da granxa.
