A elevada demanda do Galaxy Z Fold8 levou Samsung a incrementar a súa produción en 1 millón de unidades adicionais, segundo informa o medio surcoreano ETNews. A cifra súmase a unha fabricación inicial que xa superaba a das xeracións anteriores do teléfono encartable.
O novo deseño, cunha pantalla máis ancha que nos anteriores Galaxy Z Fold, parece estar a ter unha acollida especialmente positiva. As reservas superaron as previsións de Samsung e algunhas configuracións chegaron a esgotarse ou acumular importantes atrasos nas entregas durante o período de precompra, que rematou a semana pasada.
A decisión de fabricar outro millón de unidades chega despois de que a demanda superase as expectativas iniciais. A evolución das vendas podería favorecer que o formato máis ancho do Galaxy Z Fold8 gañe peso nas futuras xeracións de dispositivos encartables de Samsung e doutros fabricantes Android.
O interese por este deseño tamén coincide cos plans de Apple para lanzar o seu primeiro iPhone encartable, que segundo as informacións dispoñibles apostaría por un formato semellante.
Máis resistente do que parece
Un dos elementos que habitualmente preocupaban máis á hora de adquirir un encartable era a súa resistencia, e no caso do Galaxy Z Fold8 moitos quedan tranquilos tras ver como o youtubeiro JerryRigEverything someteu o trebello ás súas habituais probas extremas de laboratorio. A pantalla foi raiada cun coitelo e exposta á chama dun chisqueiro, con danos visibles pero sen consecuencias que impedisen o funcionamento do teléfono.
A proba máis extrema consistiu en dobrar o dispositivo no sentido contrario ao mecanismo de encarte. A operación provocou danos importantes na bisagra, un tipo de manipulación que non debe realizarse nun uso normal, pero o teléfono continuou funcionando e a pantalla interna apenas sufriu danos.
