Phantom Blade Zero será o protagonista dun State of Play especial que PlayStation emitirá o vindeiro 18 de agosto ás 4:00 horas (hora peninsular española), cunha presentación de case 20 minutos de novo gameplay no que se amosarán con maior profundidade os sistemas de combate, os personaxes e o mundo wuxia no que se desenvolve a aventura.
A emisión permitirá coñecer mellor a proposta de S-Game, que combina combates de acción dinámica con diferentes configuracións para o protagonista, Soul. O material publicado ata agora xa mostrou enfrontamentos sobre un vagón en marcha e duelos contra antigos camaradas, como The Hunt, pero a presentación promete ampliar considerablemente o que se coñece do xogo.
Un dos rostros que aparece no tráiler de reserva é o de Donnie Yen, que exerce como asesor creativo de Phantom Blade Zero desde 2023. A súa experiencia nas artes marciais e no cinema de acción contribuíu ao deseño do sistema de combate coa intención de ofrecer unha representación máis auténtica do kung fu. Yen tamén participou na captura facial e de movemento de Mó Yuan, o pai de Soul.
O State of Play permitirá ademais coñecer novos personaxes que terán un papel relevante na historia e descubrir máis posibilidades de personalización e configuración do protagonista.
Phantom Blade Zero chegará a PlayStation 5 o 29 de outubro de 2026 e xa está dispoñible para reserva (tamén na súa versión para PC). Esta reserva permite desbloquear anticipadamente o accesorio Treasure Basin e o traxe Legacy, aínda que ambos os elementos tamén poderán conseguirse mediante a progresión normal no xogo.
A retransmisión poderá seguirse a través das canles de PlayStation en Twitch e YouTube.
