Bose pon á venda a segunda xeración dos seus QuietComfort Headphones, unha renovación dos seus auriculares circumaurais con cancelación activa de ruído que incorpora audio espacial, conexión USB-C con reprodución sen perdas e melloras no sistema de cancelación. O deseño exterior tamén foi actualizado con novas formas e acabados.
A principal novidade é a incorporación de Bose TrueSpatial Technology, que permite utilizar nos QuietComfort tres modos de Bose Immersive Audio que ata agora estaban reservados á gama QuietComfort Ultra: Still, Motion e Cinema. O sistema virtualiza o son estéreo a partir de calquera fonte e modifica a súa presentación segundo o modo seleccionado.
Os auriculares conservan o procesamento dixital SoundDesign propio de Bose e engaden reprodución de audio sen perdas a través de USB-C, cunha resolución de ata 24 bits e 48 kHz. A conexión USB-C tamén permite utilizar o micrófono integrado para chamadas e videoconferencias en aplicacións como Zoom ou Microsoft Teams.
A cancelación activa de ruído tamén recibe cambios. Bose denomina agora QuietControl ao sistema e incorpora novos controis adaptativos feedforward destinados a compensar mellor as variacións no selado das almofadas. O sistema emprega seis micrófonos para detectar e corrixir con maior eficacia as filtracións acústicas que poden producirse, por exemplo, ao levar lentes, cabelo ou un gorro.
O modo Aware tamén mellora o funcionamento de ActiveSense, que axusta de forma máis gradual a cancelación cando detecta incrementos repentinos do ruído ambiental. O usuario pode modificar manualmente o nivel de cancelación desde a aplicación de Bose ou desactivalo por completo. Tamén é posible crear modos personalizados para combinar cancelación e transparencia acústica e acceder rapidamente a eles mediante o botón situado no auricular esquerdo.
O deseño mantén a configuración circumaural dos QuietComfort, pero incorpora unha diadema actualizada con axustes máis suaves e acolchado de coiro sintético. Bose tamén modificou a forza de suxeición e introduciu auriculares de forma ovalada para conseguir un perfil máis uniforme.
Os controis físicos mantéñense nos dous auriculares. No dereito concéntranse as funcións de reprodución, volume e xestión de chamadas, mentres que o esquerdo incorpora un botón para cambiar entre os modos de escoita e activar atallos como o asistente de voz do dispositivo ou Spotify Tap.
A conectividade baséase en Bluetooth 5.4 con multipunto para manter dous dispositivos conectados simultaneamente. Os usuarios de Android poden utilizar ademais Google Fast Pair para acelerar o emparellamento. A conexión USB-C admite tanto audio dixital como entrada de voz, mentres que o equipamento inclúe un cable USB-C a minijack de 3,5 mm para fontes analóxicas, como os sistemas de entretemento dos avións.
A autonomía anunciada alcanza as 24 horas, aínda que baixa ata 18 horas cando se utiliza Immersive Audio. A carga rápida permite obter ata 2,5 horas adicionais con 15 minutos de carga, e os auriculares poden continuar reproducindo audio mentres se cargan mediante USB-C.
A aplicación de Bose permite configurar un ecualizador de tres bandas, crear modos de escoita personalizados, modificar os atallos, xestionar os dispositivos Bluetooth e instalar actualizacións de firmware.
Os QuietComfort Headphones (2ª Gen) estarán dispoñibles inicialmente en negro e branco Smoke, ademais das edicións limitadas Eucalyptus Green, Dewdrop Mint e Rosewood Mauve. O prezo anunciado para Estados Unidos é de 359 dólares, comezando hoxe os primeiros envíos, mentres que en Europa aínda non temos data e prezo para a chegada destes auriculares, pero podemos entender que manterán o prezo de 399 euros dos de primeira xeración, que actualmente ofertan a 229 euros, no que podemos entender que é un xeito de desfacerse de existencias de cara á chegada da nova versión.
