OpenAI Ads expandirá a publicidade de ChatGPT a 31 mercados europeos, entre eles España, Francia, Alemaña, Italia, Suecia, Noruega, Dinamarca, Países Baixos e Austria. A medida chega seis meses despois do inicio das probas nos Estados Unidos e converte Europa na maior ampliación da plataforma publicitaria realizada ata o momento.
A publicidade estará inicialmente dispoñible para os anunciantes a través do equipo de OpenAI Ads Solutions, axencias e socios tecnolóxicos. O acceso autónomo mediante Ads Manager chegará posteriormente, durante este verán.
Os anuncios só se mostrarán aos usuarios dos plans Free e Go. As subscricións Plus, Pro e Enterprise continuarán sen publicidade. OpenAI asegura ademais que as conversas se manteñen privadas fronte aos anunciantes, que os datos dos clientes non se venden e que os anuncios aparecen claramente identificados e separados das respostas de ChatGPT.
Sinalan que a publicidade non condiciona as respostas xeradas polo servizo. Os usuarios dispoñen de controis sobre a personalización dos anuncios, mentres que os plans de pago ofrecen unha alternativa sen publicidade.
A publicidade está deseñada para aparecer cando os usuarios están explorando opcións ou tomando decisións, por exemplo ao planificar unha viaxe, escoller software empresarial, comprar produtos para o fogar ou aprender sobre unha determinada actividade. OpenAI pretende que os anuncios poidan chegar a usuarios durante diferentes fases do proceso de decisión.
Durante os seis meses de probas, a plataforma incorporou diferentes ferramentas para os anunciantes. Entre elas están a optimización das campañas orientada ás conversións, as opcións de xeolocalización e as audiencias personalizadas. Tamén se ampliaron as posibilidades de medición mediante OpenAI Pixel, Conversions API e integracións con plataformas de medición de terceiros.
OpenAI afirma que xa anunciaron os seus produtos ou servizos en ChatGPT «decenas de miles» de empresas e que a plataforma continuará evolucionando coa incorporación de novos formatos, ferramentas de optimización e sistemas de medición.
