A aplicación de escritorio de ChatGPT para macOS incorpora unha nova integración con Mensaxes que permite ao asistente acceder ás conversas almacenadas no Mac, buscar información nos chats, preparar respostas e enviar mensaxes a través da aplicación.
O novo complemento, denominado Apple Messages Plugin, está dispoñible en todos os plans da aplicación de escritorio de ChatGPT para macOS e pode empregarse tanto en ChatGPT Work como en Codex. A integración permite traballar con conversas de iMessage, SMS e RCS almacenadas no equipo.
Entre as posibilidades están localizar conversas concretas, resumir o contido de varios chats ou buscar información específica. Tamén se pode pedir a ChatGPT que prepare respostas a partir do contido das mensaxes ou que identifique posibles tarefas pendentes en conversas anteriores. Así, por exemplo, o usuario pode solicitar que revise as mensaxes do día anterior para propoñer posibles seguimentos ou que busque felicitacións de aniversario e engada as datas correspondentes ao calendario.
A integración tamén permite preparar e enviar mensaxes directamente desde Mensaxes. Por defecto, ChatGPT solicita a aprobación do usuario antes de realizar un envío e mostra tanto o contido da mensaxe como os destinatarios. É posible autorizar un envío concreto ou establecer que determinados chats poidan recibir mensaxes futuras sen unha nova confirmación.
Esta segunda opción implica un maior risco, xa que elimina a última revisión por parte do usuario antes de que ChatGPT envíe unha mensaxe no seu nome. OpenAI recomenda manter a aprobación individual nos chats que poidan conter instrucións non fiables ou información enganosa.
A autorización permanente pódese retirar desde os axustes de ChatGPT, no apartado de uso do ordenador. Dentro da xestión de Mensaxes é posible eliminar os chats incluídos na lista de destinatarios autorizados para que o sistema volva solicitar aprobación en cada envío.
A integración require conceder a ChatGPT os permisos correspondentes de macOS para acceder á aplicación Mensaxes. Ademais, nesta primeira versión o complemento só está incluído na compilación para Apple Silicon da aplicación de escritorio.
Existe tamén unha limitación relacionada cos niveis de acceso. Se unha tarefa está configurada con acceso completo ou utiliza unha modalidade que desactiva as solicitudes de aprobación, Mensaxes pode non ser capaz de mostrar a confirmación necesaria para enviar unha mensaxe. OpenAI recomenda neste caso empregar os modos Solicitar aprobación ou Aprobar por min.
Mensaxes funciona directamente no Mac e non permite interactuar remotamente con ChatGPT a través de Mensaxes. Tampouco está dispoñible actualmente na versión web ou móbil de ChatGPT, en Codex CLI nin na extensión para contornos de desenvolvemento.
A instalación realízase desde o apartado Plugins da aplicación de escritorio, onde é necesario localizar e activar o complemento Mensaxes. Unha vez instalado, pode utilizarse desde unha nova conversa de Codex ou ChatGPT Work para buscar, resumir, redactar ou enviar mensaxes.
