O agardado The Witcher 4 chegará previsiblemente en 2028, segundo confirmou CD Projekt Red nun vídeo publicado co gallo da súa participación na Gamescom 2026, no que Michał Nowakowski, codirector executivo de CD Projekt, tamén adiantou algúns detalles sobre os próximos proxectos da saga.
Nowakowski explicou que máis de 500 desenvolvedores traballan actualmente na nova entrega, protagonizada por Ciri. O xogo contará cun «enorme e inmersivo mundo aberto», combates intensos e unha historia de gran peso narrativo, nun proxecto que se presenta como o máis ambicioso realizado ata agora polo estudio polaco.
Aínda que The Witcher 4 non estará presente en gamescom 2026, a súa xanela de lanzamento xa queda situada en 2028. «Non estamos preparados para compartir unha data exacta, pero podo dicirvos isto: The Witcher 4 ten como obxectivo unha xanela de lanzamento en 2028», sinalou Nowakowski. O executivo recoñeceu que a espera será longa, pero pediu aos seguidores que permitan que o equipo continúe co desenvolvemento para ofrecer o resultado previsto.
A nova entrega forma parte dunha triloxía que CD Projekt pretende desenvolver nun período relativamente curto. Se o calendario previsto se mantén, The Witcher 5 podería chegar arredor de 2031 e The Witcher 6 en 2034.
Antes de regresar a Ciri, a saga terá unha nova aventura protagonizada por Geralt de Rivia. The Witcher 3: Wild Hunt – Songs of the Past será a terceira expansión do xogo e chegará en 2027 a PlayStation 5, Xbox Series X|S e PC. O proxecto está sendo desenvolvido en colaboración con Fool’s Theory, estudio formado por veteranos que participaron anteriormente en The Witcher 3.
O primeiro material de Songs of the Past será presentado durante gamescom. A expansión formará parte da cerimonia Opening Night Live, presentada por Geoff Keighley. Espérase a presentación dun tráiler e novas imaxes do xogo.
