Xbox puxo en pre-venda a Designed for Xbox 25th Anniversary Collection, unha selección de periféricos e accesorios creados para conmemorar os 25 anos da marca. A gama recupera elementos estéticos da primeira consola Xbox, especialmente o característico acabado verde translúcido, combinado con produtos actuais de diferentes fabricantes.
A colección inclúe o rato Razer Basilisk V3 Pro 35K – Xbox 25 Anniversary Edition, un modelo sen fíos con deseño ergonómico, iluminación RGB e ata 140 horas de autonomía. Incorpora o sensor óptico Razer Focus Pro 35K Optical Sensor Gen-2, unha roda de desprazamento de catro direccións e amplas posibilidades de configuración.
Tamén forma parte da colección o teclado mecánico Razer BlackWidow V4 75% – Xbox 25 Anniversary Edition. O formato compacto conta con interruptores intercambiables en quente, iluminación Razer Chroma RGB e unha tecla Xbox específica que permite abrir directamente a Game Bar en Windows.
Os auriculares Razer Hammerhead V3 X HyperSpeed – Xbox 25 Anniversary Edition achegan a celebración ao apartado de audio. Estes auriculares intraaurais sen fíos empregan HyperSpeed Wireless e Bluetooth 5.3, con conexión de 2,4 GHz de baixa latencia para xogos. O sistema SmartSwitch permite alternar entre dispositivos conectados mediante 2,4 GHz e Bluetooth, mentres que a autonomía total alcanza as 35 horas (ata 10 horas nos auriculares e outras 25 mediante o estoxo de carga).
A colección tamén inclúe o cargador 8BitDo Ultimate Charging Dock for Xbox Controllers – X25 Special Edition, cun acabado verde translúcido inspirado na primeira xeración da consola. É compatible cos mandos sen fíos de Xbox Series X|S e Xbox One.
Backbone Pro Xbox 25th Anniversary Edition recupera tres cores asociadas á historia de Xbox (Iconic Blue, Bold Orange e Crystal Clear). As unidades comercialízanse nun formato de caixa sorpresa, polo que non é posible saber que variante se atopa no interior antes de abrila.
Para transportar dispositivos, a colección incorpora tamén a PowerA Xbox Sling Bag, unha bolsa cruzada deseñada para levar consolas ROG Xbox Ally e ROG Xbox Ally X, ademais de mandos, auriculares, teléfono e outros accesorios. Dispón de catro compartimentos, protección para os sticks e un sistema de organización para os cables de carga.
O GameSir X5 Lite for Xbox pecha a selección cun mando para xogos en dispositivos móbiles, presentado nun acabado verde translúcido conmemorativo. Conta con licenza oficial de Xbox, certificación Apple MFi e compatibilidade con dispositivos iOS e Android, ademais de acceso a Xbox Game Pass.
