Xbox e TCL asinaron un acordo para levar a aplicación de Xbox a determinados televisores da marca nos vindeirosmeses. A integración permitirá acceder a Xbox Cloud Gaming directamente desde o televisor, sen necesidade de utilizar unha consola.
A aplicación estará dispoñible en modelos compatibles de TCL en máis de 25 países, ampliando o acceso ao servizo de xogo na nube a millóns de usuarios que xa dispoñen dun destes televisores.
Para utilizar o servizo será necesario contar cun televisor TCL compatible, un mando compatible e tempo de xogo na nube, incluído nas subscricións de Xbox Game Pass que ofrecen esta modalidade ou dispoñible para adquirir por separado. Os subscritores de Game Pass poderán acceder directamente ao catálogo de xogos compatibles coa reprodución na nube.
A través da aplicación será posible transmitir os xogos compatibles directamente no televisor, incluíndo lanzamentos, franquías coñecidas e producións independentes. A experiencia mantén ademais a integración co ecosistema de Xbox, polo que os xogos, amizades, logros e partidas gardadas poden acompañar o usuario ao cambiar entre un televisor compatible, unha consola ou un PC.
A incorporación de TCL súmase á estratexia de Xbox de levar os seus servizos a un número crecente de dispositivos mediante acordos con fabricantes de hardware, reducindo a dependencia dunha consola para acceder aos seus xogos.
