Bose amplía a súa gama de auriculares de deseño aberto cos novos Sport Open Earbuds e Ultra Open Earbuds (2nd Gen), dous modelos que permiten escoitar música sen perder a percepción do que sucede arredor. Ambos empregan a tecnoloxía Bose OpenAudio, que reproduce o son a través do aire próximo ao oído mediante un transdutor e unha estrutura acústica controlada, sen recorrer á condución ósea.
Os Bose Sport Open Earbuds están deseñados para correr, facer exercicio e practicar actividades ao aire libre. O seu deseño en forma de C, cunha estrutura de silicona suave, busca manter os auriculares firmes durante o movemento, mentres que os controis físicos texturizados facilitan o manexo mesmo coas mans húmidas. A construción conta con certificación IP54 fronte á suor, salpicaduras e po.
Os transdutores dinámicos ofrecen un son equilibrado e incorporan Auto Volume, unha función que adapta automaticamente o volume aos cambios no ruído ambiental. A autonomía chega ás sete horas por carga, ás que se poden engadir outras 22 horas mediante o estoxo de carga sen fíos.
O modelo deportivo estará dispoñible en negro e White Smoke, ademais dunha edición limitada en Eucalyptus Green. O seu prezo será de 199,95 euros.
Os Bose Ultra Open Earbuds (2nd Gen) manteñen o característico deseño en forma de pinza da primeira xeración, pero incorporan un novo transdutor capaz de ofrecer máis graves e maior volume. Tamén contan con volume automático e coa tecnoloxía SpeechClarity, que utiliza un micrófono e unha unidade de captación de voz en cada auricular para reducir o impacto do ruído ambiental nas chamadas.
A principal novidade funcional é Cinema Mode, baseado na tecnoloxía Bose TrueSpatial, que amplía o escenario sonoro ao reproducir películas, series ou podcasts e mantén as voces centradas para facilitar a comprensión dos diálogos.
A autonomía sobe ata as nove horas, con outras 19,5 horas proporcionadas polo estoxo, que tamén admite carga sen fíos. O modelo é compatible con Snapdragon Sound e aptX Adaptive en dispositivos Android compatibles, con menor latencia e maior calidade de audio.
Os Ultra Open estarán dispoñibles en negro e White Smoke, xunto con edicións limitadas en Cherry Chocolate, Olive Green e Sky Pink. O seu prezo será de 299,95 euros.
Os dous dispositivos empregan Bluetooth 5.4, conexión multipunto para dous equipos, códecs SBC e AAC e Google Fast Pair. Tamén permiten configurar accesos directos para Spotify Tap e o asistente de voz do teléfono, mentres que os Ultra Open Earbuds engaden o acceso aos modos Bose Immersive Audio.
