EA Sports FC 27 xa está dispoñible en todo o mundo para PlayStation 5, PlayStation 4, Xbox Series X|S, Xbox One, PC, Nintendo Switch e Nintendo Switch 2. A nova entrega da saga de fútbol introduce The Grounds, un novo espazo social que combina fútbol de rúa e competición, xunto con cambios nos principais modos de xogo.
The Grounds permite participar en partidas rápidas, enfrontamentos 1 contra 1 e encontros con amigos en Clubs. O novo espazo tamén incorpora mentores de fútbol e opcións para mellorar as habilidades e personalizar a experiencia dentro e fóra do terreo de xogo. O modo, incluído Clubs, está dispoñible exclusivamente nas versións para PlayStation 5, Xbox Series X|S, PC e Nintendo Switch 2.
O modo Carreira recibe un novo mercado de fichaxes con negociacións entre clubs e valoracións dos xogadores apoiadas por TransferRoom. As negociacións incorporan novas posibilidades, como cláusulas de rendemento e de recompra, mentres que os Dynamic OVRs adaptan a valoración dos futbolistas en función da súa forma, moral e estado físico. Tamén se poden crear e compartir escenarios personalizados a través dun portal web independente e acceder a desafíos creados pola comunidade.
Football Ultimate Team incorpora FUT Gallery, un novo espazo no que se poden reunir elementos de xogadores actuais e históricos para aumentar o nivel da colección, obter recompensas e personalizar a identidade do club. A modalidade tamén engade variantes Holographic e elementos Hall of FUT, ademais de cambios nos SBC e novos eventos individuais.
A xogabilidade introduce un sistema máis fluído, con cambios nos saques de esquina, unha maior capacidade de anticipación dos atacantes e unha defensa máis orientada ao control dos xogadores e ás partidas competitivas. Estas modificacións súmanse a outras melloras desenvolvidas a partir dos comentarios da comunidade.
A vertente de autenticidade mantén máis de 21.000 xogadores de máis de 800 clubs e seleccións, con 140 estadios e máis de 35 ligas representadas. O xogo conta co apoio de máis de 300 socios relacionados co fútbol a nivel mundial.
EA tamén ofrece FC 27 Lite, unha versión de balde para descargar que funciona como porta de entrada á nova entrega. Inclúe os modos Kick-Off, Learn to Play, Online Friendlies e Online Seasons, aínda que require conexión permanente á Internet e unha conta de EA. Os xogadores poden pasar posteriormente á versión completa.
O lanzamento acompáñase ademais da actualización de tempada de EA Sports FC Mobile 27 e dun evento polo aniversario, mentres que a banda sonora de FC 27 reúne 120 cancións de artistas de 36 países. EA Play ofrece aos seus subscritores unha proba de dez horas da versión completa, conservando o progreso realizado durante a proba.
