Prime Video converterase na plataforma de emisión exclusiva a nivel mundial dos premios Emmy durante os vindeiros seis anos, tras o acordo alcanzado coa Television Academy. O pacto, que entrará en vigor coa gala de 2027, pon fin ao tradicional sistema de rotación entre ABC, CBS, FOX e NBC que se mantivo durante décadas e que rematou coa edición deste ano.
A gala continuará celebrándose en directo cada setembro, pero cunha diferenza importante: a emisión será de balde e non requirirá unha subscrición a Prime Video. A partir de 2027, os espectadores de máis de 200 países poderán seguir a cerimonia en directo a través da plataforma.
O acordo tamén amplía o alcance da colaboración máis alá da gala anual. Prime Video desenvolverá novas experiencias e propostas arredor dos Emmy ao longo de todo o ano, co obxectivo de facilitar o descubrimento e a participación dos espectadores arredor das series, programas, creadores e intérpretes recoñecidos polos premios.
«A televisión nunca foi tan global e os Emmy deberían ser unha celebración que o mundo poida compartir», sinalou Cris Abrego, presidente da Television Academy. Segundo explicou, o acordo permitirá combinar o legado construído polas cadeas de televisión co alcance internacional de Prime Video e cunha colaboración máis ampla coa academia durante todo o ano.
Mike Hopkins, responsable de Prime Video e Amazon MGM Studios, destacou que «durante case oito décadas, os Emmy recoñeceron as mellores historias e talentos da televisión» e asegurou que a plataforma afronta os vindeiros seis anos como a casa mundial desta celebración.
