A revista Fortune analiza a transformación de Xbox baixo a dirección de Asha Sharma, a executiva de 38 anos que Microsoft puxo á fronte da división en febreiro para recuperar a súa rendibilidade. A nova responsable impulsou despedimentos masivos, reorganizou estudios e prepara cambios en Game Pass e no hardware, mentres medran as especulacións sobre unha posible separación do negocio.
Sharma, sen experiencia previa na industria dos videoxogos, substituíu Phil Spencer cunha estratexia centrada nas grandes franquías, na recuperación dos xogos exclusivos e no control dos custos. Segundo Fortune, Xbox xa eliminou 1.868 postos de traballo e prevé reducir o persoal en 3.200 durante o próximo ano, con novas roldas de despedimentos previstas para os vindeiros meses.
A división factura preto de 21.000 millóns de dólares, pero a súa marxe de beneficio sitúase aproximadamente no 3 %. A situación responde, en parte, a decisións estratéxicas que non deron os resultados esperados: a expansión mediante adquisicións, a complexidade derivada da integración de Activision Blizzard e as dificultades para compatibilizar os ingresos de Game Pass coas vendas dos xogos a prezo completo.
A nova dirección quere concentrar os investimentos en franquías como Minecraft, Call of Duty, World of Warcraft e Overwatch, ademais de reforzar os lanzamentos exclusivos. Game Pass tamén podería experimentar unha profunda renovación, cunha estrutura por niveis que permitiría escoller prestacións como os xogos de consola, o xogo na nube e o multixogador.
Novas consolas a prezos inviables
O hardware será outro dos piares da estratexia. Xbox prepara unha consola portátil para finais de 2027 e unha nova consola doméstica para o Nadal de 2028, desenvolvida baixo o nome en clave Project Helix. As previsións internas citadas por Fortune sitúan o seu posible prezo entre 1.200 e 1.800 dólares, salvo que Microsoft decida subvencionar parte do custo.
O proxecto tamén provocou tensións entre Xbox e Windows sobre o sistema operativo que utilizará a futura consola. O equipo de Sharma pretende controlar o software para optimizar o rendemento nos videoxogos, fronte á intención inicial de Windows de empregar unha versión reducida do seu sistema operativo doméstico. Os prazos de desenvolvemento adiantáronse varios meses e a intelixencia artificial podería contribuír a axilizar determinados procesos, aínda que Sharma asegura que só se empregará para resolver problemas concretos.
A reestruturación alimenta as dúbidas sobre o futuro de Xbox dentro de Microsoft. Tras o nomeamento de Sharma, os empregados pasaron a utilizar enderezos de correo electrónico co dominio xbox.com e a división recuperou oficialmente o nome Xbox, en substitución de Microsoft Gaming. Fontes consultadas por Fortune cren que estes cambios poderían preparar o negocio para unha venda, unha escisión ou a entrada de investidores externos.
Microsoft rexeita que esa sexa a intención. Judson Althoff, responsable do negocio comercial do grupo, defendeu o valor estratéxico de Xbox polos avances que achega aos servizos na nube e pola súa relación cos distribuidores e cos creadores de contidos. «Non a teriamos posto á fronte dun negocio que pretendésemos vender», afirmou sobre Sharma.
Sharma espera que as melloras financeiras comecen a apreciarse no exercicio fiscal de 2027. A súa ambición é converter Xbox nunha das grandes plataformas de lecer do mundo, cun obxectivo de 1.000 millóns de usuarios activos diarios, fronte aos arredor de 100 millóns actuais.
