Trala resolución definitiva outorgada polo Centro para o Desenvolvemento Tecnolóxico e a Innovación (CDTI) no marco da convocatoria Innterconecta-Step, a firma viguesa Optare Solutions avanza na fase de desenvolvemento e execución de catro novos proxectos de investigación industrial en consorcio.
Estes consorcios, apoiados con financiamento europeo para impulsar a autonomía estratéxica da Unión Europea fronte a dependencias tecnolóxicas externas, contan cun orzamento global conxunto de 9,9 millóns de euros, dos cales Optare xestionará de forma directa máis de 1,1 millóns de euros destinados ás súas actividades individuais de I+D+i.
Dende Optare lembran que a dita convocatoria responde á necesidade de blindar as capacidades tecnolóxicas esenciais de Europa. No ámbito das redes e as telecomunicacións, esta autonomía esixe que as infraestruturas críticas e a gran industria poidan explotar o potencial da IA sen depender de nubes públicas de terceiros nin comprometer a privacidade operativa. Para dar resposta a este desafío, os consorcios nos que participa Optare integran desde ciberseguridade postcuántica ata arquitecturas de computación no bordo (edge) e modelos de intelixencia artificial locais, deseñados para procesar a información sensible directamente na propia infraestrutura de rede.
“O gran debate actual da dixitalización crítica non reside unicamente na capacidade dos algoritmos, senón na soberanía do dato e a viabilidade do modelo de negocio», sinala Luis Alfonso Álvarez Sestelo, conselleiro delegado de Optare, que engade que “nin os operadores nin os sectores altamente críticos poden asumir os riscos de privacidade, latencia ou a exposición a provedores externos cuxos cambios de tarifas por consumo de tokens poden desestabilizar o caso de negocio. A verdadeira resiliencia pasa por achegar a intelixencia artificial ao bordo da rede: modelos locais que aseguren control absoluto sobre os datos e unha total previsibilidad de custos”.
Esta folla de ruta técnica materialízase a través de catro proxectos orientados a casos de uso de alta esixencia:
- ImNext. Aborda a modernización cara ás redes do futuro (B5G/6G) e a integración terrestre-satélite, investigando a seguridade adaptativa en divisións de rede (slicing) e o despregamento ciberseguro de modelos de linguaxe de gran escala (LLM) no bordo (edge), o que permite executar asistentes e analítica avanzada directamente nos nodos da infraestrutura de telecomunicacións.
- DSFV (Dixital Safe Fishing Vessel). Traslada estas capacidades ao sector marítimo para validar arquitecturas de computación embarcadas que garantan o procesamento local de datos críticos, permitindo a toma de decisións autónoma en buques sen depender de conectividade satelital continua.
- SICODI: Enfócase na automatización segura de fábricas autónomas mediante o despregamento de redes privadas 5G con arquitectura Open RAN, control adaptativo do tráfico (network slicing) e respaldo satelital ante fallos para a toma de decisións en planta en tempo real.
- Q-AIR: Desenvolve solucións de ciberseguridade para protexer redes móbiles privadas en contornas altamente críticas (defensa, emerxencias e infraestruturas estratéxicas) fronte a futuras ameazas informáticas mediante criptografía postcuántica (PQC) e comunicacións cuánticas (QKD).
Co desenvolvemento destes consorcios, Optare Solutions busca consolidar o seu papel como socio tecnolóxico de referencia en telecomunicacións avanzadas, estendendo a súa experiencia en software de rede “cara a contornas estratéxicas onde a computación local e a ciberseguridade son cruciais para liderar a transformación dixital europea”.
