Apple celebra o 25 aniversario da presentación do iPod orixinal cunha sorpresa interactiva na súa web de Apple Music. Ao acceder a unha páxina inexistente do servizo, aparece unha versión virtual do reprodutor musical que permite explorar unha biblioteca de 1.029 cancións e recuperar a experiencia da súa característica roda de control.
Estamos ante un curioso xeito de lembrar o aniversario dun dispositivo presentado o 23 de outubro de 2001, que popularizou a idea de levar «1.000 cancións no peto» e se converteu nun dos produtos máis representativos da historia de Apple.
A interface reproduce o deseño do primeiro iPod, cos seus menús de listaxes de reprodución, artistas, cancións e axustes. A roda de desprazamento e os botóns son interactivos, polo que é posible navegar pola biblioteca e reproducir fragmentos dos temas incluídos. Cada canción pode escoitarse durante un máximo de 90 segundos.
A selección musical está marcada polos éxitos de comezos dos anos 2000, con artistas como Gorillaz, Daft Punk, U2, Coldplay, Alicia Keys, Nelly Furtado, Train, Remy Zero, Outkast, Jennifer Lopez, Jason Mraz, Daddy Yankee, Juanes, Manu Chao, Shakira, Foo Fighters, Green Day, Evanescence e moitos outros.
A recreación inclúe ademais Brick, o xogo inspirado en Breakout que estaba agochado no iPod orixinal. Para acceder a el hai que entrar na pantalla de información do dispositivo virtual e manter premido o botón central durante uns segundos, seguindo o procedemento do reprodutor físico.
A experiencia funciona sen unha subscrición activa a Apple Music. Aínda que os controis poden presentar algúns erros e o funcionamento non é igual de fiable en todos os equipos, recoméndase acceder desde un teléfono móbil ou unha tableta para aproveitar os controis táctiles.
O aniversario serve así para recuperar un dos elementos máis recoñecibles da historia dos reprodutores musicais dixitais, nun momento no que a música se consome principalmente mediante servizos de streaming e smartphones.
