A Xunta presentou a Estratexia Galega de Protección das Persoas Consumidoras e Usuarias 2026-2030, unha folla de ruta que recolle 21 medidas para adaptar as políticas de consumo aos cambios sociais, económicos e tecnolóxicos dos próximos anos. A iniciativa presta especial atención aos colectivos máis vulnerables e aos riscos asociados á dixitalización, á intelixencia artificial e á transición ecolóxica.
O plan estrutúrase en tres eixes: protección e equidade no mercado dixital, consumo sostible e responsable, e mellora da xestión, formación e información. Entre as medidas anunciadas figura a creación dunha Xanela +65, destinada a ofrecer atención específica ás persoas maiores e facilitar a resolución dos seus conflitos de consumo.
A protección dos menores fronte a prácticas como a publicidade encuberta e as compras integradas nos videoxogos constitúe outro dos obxectivos. Tamén se prevé reforzar a seguridade e a trazabilidade dos produtos, especialmente os procedentes de terceiros países que se comercializan a través de internet, mediante o labor de control do Laboratorio de Consumo de Galicia.
A estratexia incorpora medidas para fomentar a reutilización e reparación de produtos, aproveitar mellor os recursos e combater prácticas enganosas como o greenwashing. Estas actuacións vincúlanse co Plan Estratéxico do Comercio de Galicia 2025-2030, co propósito de impulsar o consumo responsable e de proximidade e fortalecer o comercio local.
A dixitalización das reclamacións, coa incorporación de ferramentas de intelixencia artificial, será outra das liñas de actuación. O plan tamén contempla axilizar a súa tramitación e potenciar a mediación e a arbitraxe como vías para resolver conflitos. A colaboración coas oficinas municipais, os concellos e as asociacións do sector completarase cun repositorio dixital de normativa e xurisprudencia.
A formación e a información aos consumidores reforzaranse a través da Escola Galega de Consumo, con especial atención á educación financeira, a vivenda, a intelixencia artificial e a protección de datos.
A presentación correu a cargo do conselleiro de Emprego, Comercio e Emigración, José González, acompañado polo director xeral de Comercio e Consumo, Gabriel Alén, e pola xerente do Instituto Galego do Consumo e da Competencia, Sol Vázquez. A elaboración do documento contou coa participación das principais entidades do sector, coas que se prevé manter unha colaboración permanente mediante foros periódicos.
