Xbox Game Pass prepara unha nova remesa de incorporacións para novembro, cunha selección de xogos que van desde aventuras e títulos de estratexia ata experiencias cooperativas de acción e terror. Entre os lanzamentos máis destacados figuran Escape Academy 2: Back 2 School, Warhammer Survivors e Thronefall, aos que se suman outras novidades como Aphelion e John Carpenter’s Toxic Commando.
A primeira incorporación destacada chega o 4 de novembro con Vampire Crawlers: The Turbo Wildcard from Vampire Survivors, que amplía a fórmula de Vampire Survivors cun sistema de cartas e combates por quendas. O xogo permite construír barallas, explorar catacumbas e encadear combinacións de ataques nunha experiencia de estilo roguelite. Ese mesmo día tamén se incorpora Void/Breaker, un xogo de acción en primeira persoa que abandona o acceso anticipado coa súa versión 1.0 e aposta por combates contra máquinas, modificación de armas e combinacións de equipamento.
O 5 de novembro será a quenda de Escape Academy 2: Back 2 School, que leva os crebacabezas das salas de escape a un mundo aberto, cunha modalidade cooperativa para dous xogadores tanto en liña como en local. Tamén chegará Firefighting Simulator: Ignite, un simulador de extinción de incendios que permite afrontar misións en equipo con ata tres amigos, e MySims: Colección Sofá y Mantita, que reúne as versións actualizadas de MySims e MySims Kingdom.
A oferta do 10 de novembro inclúe Football Manager 27 Console, a versión para consolas da nova entrega do simulador futbolístico, e Warhammer Survivors, un título de acción tipo bullet heaven desenvolvido por Auroch Digital en colaboración con poncle, responsables de Vampire Survivors. A partir do universo Warhammer, o xogo combina personaxes, faccións inimigas e armamento da franquía cunha estética de pixel art animado. Ese mesmo día tamén se estrea Tanuki: Pon’s Summer, unha aventura na que hai que preparar un festival tradicional en apenas un mes, realizando encargos e participando en actividades como a cociña ou o sumo.
O 11 de novembro chegará Hope in the City, unha aventura de misterio protagonizada por Hope Song, unha moza de 17 anos que investiga a desaparición dos seus pais. A súa particularidade está nun sistema que permite transformar os debuxos da protagonista en probas para avanzar na investigación. Tamén se incorpora Thronefall, un xogo de estratexia minimalista no que hai que construír e desenvolver un pequeno reino durante o día e defendelo pola noite fronte a sucesivas vagas de inimigos.
John Carpenter’s Toxic Commando estará dispoñible o 12 de novembro. Trátase dunha experiencia de acción e supervivencia cooperativa para ata catro xogadores, ambientada nun mundo invadido por zombis e estruturada en misións que transcorren en escenarios semiabertos.
O 17 de novembro chegarán outras dúas incorporacións. Aphelion, unha aventura de ciencia ficción en terceira persoa desenvolvida por Don’t Nod en colaboración coa Axencia Espacial Europea, sitúa os xogadores nun planeta xeado tras o accidente dunha misión espacial. A historia alterna entre dous astronautas, Ariane e Thomas, que deben sobrevivir nunha contorna hostil. Ese mesmo día tamén se incorpora Paw Patrol: Mundo Dino, unha aventura para un ou dous xogadores na que os protagonistas da Patrulla Canina deberán explorar unha illa, rescatar dinosauros e frustrar os plans do alcalde Humdinger.
A selección de novembro complétase o día 15 coa chegada ao catálogo de Game Pass Essential de oito xogos: Banjo-Kazooie, Banjo-Tooie, Banjo-Kazooie: Nuts & Bolts, Gears of War: Judgment, Halo: Spartan Assault, Perfect Dark, Viva Piñata e Viva Piñata: Trouble in Paradise.
Algunhas destas incorporacións tamén amplían a súa dispoñibilidade a novos niveis de subscrición. Vampire Crawlers e Aphelion pasan a estar incluídos en Game Pass Premium, mentres que MySims: Colección Sofá y Mantita e Void/Breaker amplían a súa presenza ás consolas e ao xogo na nube, respectivamente.
