A firma galega Altia, referente tecnolóxico no ámbito estatal e europeo, deu un novo avance no leste peninsular coa apertura dunha nova oficina en Barcelona. Este espazo, situado nun polo tecnolóxico de referencia na cidade, acompaña o crecemento do equipo de Altia en Cataluña e reforza a capacidade da empresa de Oleiros para seguir desenvolvendo proxectos tecnolóxicos xunto aos seus clientes.
A día de hoxe Altia conta con 200 profesionais en Cataluña, “un equipo que combina coñecemento, experiencia e capacidades tecnolóxicas para responder os retos de organizacións de distintos sectores”, segundo informaron fontes da empresa, engadindo que “este crecemento reflicte a vontade de Altia de consolidar a súa presenza nun territorio estratéxico e seguir construíndo relacións de longo percorrido co tecido empresarial e institucional catalán”.
En palabras de Alberto Marín, director de Altia en Barcelona, “a apertura desta nova oficina reflicte o momento de crecemento que estamos a vivir en Cataluña e a nosa ambición de seguir avanzando xunto aos nosos clientes. Contamos cun equipo cun enorme talento e coñecemento do mercado, e queremos seguir creando as condicións para que ese potencial tradúzase en novos proxectos, relacións de confianza e oportunidades de futuro”.
Lembrar que o equipo catalán de Altia fortaleceuse hai dous anos coa incorporación de IN2, consultora tecnolóxica con sede en Barcelona e máis de 30 anos de traxectoria, que se integrou no grupo en decembro de 2024. “Esta operación supuxo un paso importante na nosa estratexia de crecemento, ao sumar novos profesionais e ampliar as nosas capacidades en ámbitos como a sanidade, os servizos sociais, o turismo, o transporte e a industria 4.0”, informou a empresa galega.
