A emulación de Xbox 360 chega aos ordenadores Mac con macXenos, un proxecto de código aberto que adapta o emulador Xenia (que fixo posible a emulación en Windows) ao ecosistema de Apple mediante unha implementación nativa baseada en Metal. O programa permite executar xogos da consola de Microsoft en macOS sen necesidade de recorrer a máquinas virtuais nin a capas de compatibilidade de Windows.
O proxecto, desenvolvido por Greg Gant, parte principalmente de Xenia Canary e incorpora tamén algúns cambios procedentes de Xenia Edge. Un dos seus principais traballos técnicos foi reescribir o sistema de renderización gráfica para utilizar directamente Metal 3, a API gráfica de Apple, co obxectivo de mellorar o rendemento e a compatibilidade.
macXenos conta cunha interface inspirada no menú Blades da Xbox 360, que permite navegar pola biblioteca de xogos, acceder ás configuracións e xestionar os perfís de usuario. O deseño reproduce a estética do sistema orixinal sen pretender ser unha copia exacta. A navegación pode realizarse cun mando, incluído o acceso ao panel de configuración mediante o botón Guide.
O emulador incorpora tamén ferramentas para axustar a resolución interna dos xogos e mellorar a imaxe mediante AMD FSR, AMD CAS e Apple MetalFX. A aplicación admite diferentes mandos recoñecidos por macOS, permite reasignar botóns e configurar a vibración e as zonas mortas dos joysticks. Tamén conserva as partidas gardadas e permite consultar os xogos utilizados recentemente.
O desenvolvedor utilizou un Mac mini con procesador M4 como referencia para as probas de rendemento. Segundo explica nun vídeo de presentación, os títulos que probou poden funcionar a 30 ou 60 fotogramas por segundo cunha resolución de 720p e técnicas de reescalado, aínda que o resultado depende de cada xogo. Nas primeiras execucións pode producirse unha perda temporal de fluidez mentres se compilan os shaders.
A compatibilidade de xogos é bastante desigual. A documentación do proxecto mantén unha relación de xogos probados, cos resultados obtidos e as taxas de fotogramas rexistradas nun Mac mini M4. Algúns funcionan correctamente, mentres que outros presentan problemas ou aínda non se poden executar.
O proxecto distribúese de balde e o seu código está dispoñible en GitHub baixo unha licenza BSD. O responsable recoñece que empregou ferramentas de intelixencia artificial durante o desenvolvemento, aínda que salienta o traballo manual realizado na interface e na adaptación gráfica.
