
O Grupo Nueva Pescanova puxo en marcha OptimIA, un proxecto de innovación industrial para desenvolver unha plataforma tecnolóxica baseada en intelixencia artificial (IA) e dirixida a mellorar os procesos produtivos do grupo mediante ferramentas avanzadas de supervisión, planificación e predición. A iniciativa presentouse hoxe durante a xornada Demo Day Clusaga Innova, que organiza a Agrupación industrial Alimentaria de Galicia.
Segundo explica a empresa galega de produtos do mar, a plataforma combina intelixencia artificial xenerativa, procesamento da linguaxe natural (NLP), visión artificial, analítica avanzada e aprendizaxe máquina (machine learning) para mellorar a eficiencia operativa e a toma de decisións nos centros industriais da compañía. En OptimIA, liderado por Nueva Pescanova, participan como socios tecnolóxicos OSIX Tech, Analytics by Kaizen (ABK) e ADM Galicia.
O proxecto, que se está aplicando e validando nas plantas do grupo en Galicia, enfócase en tres ámbitos de traballo: supervisión intelixente de procesos e control de calidade mediante ferramentas de IA; optimización da planificación da produción a través de sistemas avanzados que consideran á vez múltiples variables e restricións operativas; e modelos de predición que permiten anticipar o comportamento de determinados tratamentos aplicados a produtos do mar.
“Estes modelos deséñanse a partir dos datos que se extraen da monitoraxe en tempo real dos procesos, para o que se emprega un banco de ensaios intelixente equipado con sensores avanzados”, sinala o grupo, engadindo que “coa aplicación de OptimIA búscase ampliar a dixitalización dos procesos industriais, reducir erros operativos, potenciar a eficiencia produtiva, optimizar o uso de recursos, mellorar a rastrexabilidade e o control de calidade e avanzar cara a modelos de industria intelixente baseados en IA”.
O proxecto está financiado pola Xunta de Galicia a través do Instituto Galego de Promoción Económica (IGAPE).
