704 maiores percorreron 65 mil quilómetros empregando ferramentas dixitais

venres, 20 de maio do 2022 Redacción

Irene Bonome Gradaílle, xefa do departamento de Sociedade e Talento Dixital da AMTEGA, no acto

Ao longo de 20 días, e tras recibir a formación necesaria nos Centros de Competencias dixitais, os participantes no reto #CaminaenDigital camiñaron nas súas contornas, mediron as distancias percorridas con ferramentas tecnolóxicas, sacaron fotografías, gravaron vídeos e compartiron estas experiencias na páxina web do concurso e da páxina de Facebook da iniciativa que rematou cunha escape room tras a que se realizou a entrega de premios.
En moitos dos casos foi a primeira vez na que fixeron uso de aplicacións de medición de pasos, ou mesmo a primeira ocasión en que sacaron unha imaxe ou unha captura de pantalla e a enviaron a través dunha rede social. Este era o principal obxectivo do reto: aumentar a capacitación das persoas maiores e familiarizalas co uso das tecnoloxías dixitais. Mais o concurso tamén supuxo, segundo manifestaron algúns dos responsables dos centros de competencias dixitais, unha experiencia que animou a achegarse e a coñecer a actividade formativa destes espazos para a inclusión dixital a persoas que até agora nunca o fixeran. Cumpríronse así os propósitos principais desta iniciativa coordinada pola AMTEGA, a través da Rede CeMIT, dentro da programación creada para celebrar este ano o Día de Internet, no seno da asociación de ámbito estatal Somos Digital.

Premios colectivos e individuais

Coa emisión en liña transmitida desde o GaiásTech para toda España, puido verse a alegría coa que recibiron o premio ao centro que recorreu máis quilómetros no Centro de Dinamización Tecnológica Local de El Franco, en Asturias, onde o seu equipo, formado por 45 persoas maiores, percorreu 5.050 quilómetros dende o pasado 29 de abril. Tamén no espazo CyL Digital de Zamora recibiron con moita ilusión o galardón por ser o centro no que recorreron máis km. por persoa, unha media de 265 km. por participante ao longo de 20 días. Foron recoñecementos que se sumaron aos que recibiron Mercedes Maroto, de Calzada de Calatrava, por ser a participante que percorreu máis quilómetros, 598, e Julia Almeida e María José Camba, ambas de Zamora, por subir o vídeo e a imaxe con máis Gústame na conta de Facebook da iniciativa. Todos eles recibiron dispositivos tecnolóxicos cedidos polo Comité de Impulso del Día mundial de Internet.

Unha experiencia inclusiva para todas as persoas

A experiencia do reto adaptouse a todas as situacións, grazas ao traballo dos axentes dinamizadores dos centros de competencias dixitais. Houbo lugares, como Villanueva de Oscos, en Asturias, onde algunhas das persoas participantes facían as súas andainas dentro do polideportivo, xa que son usuarias do centro de día e da residencia de anciáns da vila e, polas súas características físicas, requirían un lugar cómodo para andar no que poder descansar cada pouco. Salientable é tamén o caso de San Benito, un municipio de Cidade Real, onde interviñeron no reto 29 dos seus 185 habitantes, de xeito que o Reto foi o tema principal de conversa nestes días. Noutros casos, o pique san entre localidades próximas animaba a realización de km., xa que a clasificación dos quilómetros percorridos por cada centro e mesmo por cada persoa podía verse día a día na páxina web da iniciativa, creada e dinamizada polo Colexio Profesional de Enxeñaría en Informática de Galicia, quen tamén construíron o Escape Room co que se puxeron en práctica, unha vez máis, as habilidades informáticas adquiridas polos participantes.
As dúas iniciativas forman parte da ampla programación posta en marcha pola Asociación Somos Digital para celebrar o Día de Internet, que este ano se celebrou baixo o lema Tecnoloxías dixitais para as persoas maiores e o envellecemento saudable.

PUBLICIDADE