85 empresas xúntanse en Talentia Summit co puxante mercado laboral galego

martes, 22 de outubro do 2019 Fernando Sarasketa

A actividade do evento Talentia Summit 19, destinado a achegar un punto interactivo e dinámico de encontro entre empresas contratantes e profesionais contratábeis, todo cun forte ingrediente de capacitación, innovación e tecnoloxías, trasladou hoxe o seu eixe de actividades dende o Auditorio de Galicia (onde se celebraron onte varios relatorios de primeiro nivel sobre talento e empresas) cara ao Palacio de Congresos en San Lázaro (Compostela). Este segundo emprazamento (a Feira de Talento) abriu esta mañá as súas portas confirmándose como un fervedoiro de traballo en rede, intercambio de coñecemento, entrega de currículos, entrevistas e obradoiros.
Na cita, con stand de seu, participan unhas setenta empresas de todos os sectores, unha boa parte delas directamente relacionadas coas tecnoloxías e a innovación (Dinahosting, Tecalis, Everis, Indra ou ViewNext, entre outras moitas) e outras coa alimentación, o motor ou os deportes: Decathlon, Gadis, Carrefour, Cortizo, FINSA, Viaqua ou Castrosúa, entre outras. Noutro dos recantos, o espazo de networking, teñen presenza propia outras 15 empresas e entidades máis. Alí estanse a desenvolver obradoiros de video-currículos, presentacións, charlas, cursos e relatorios.
A Feira do Talento que se está a celebrar até mañá no Palacio de Congresos (unha xuntanza aberta con todo de actividades para mostrar e impulsar as capacidades de cada quen: un espazo de encontro entre empresas e posíbeis traballadores e entre empresas e provedores de servizos) vén da man do Concello de Santiago, como o resto do programa de actividades de Talentia Summit.
Este ano, como sinalamos nos días previos ao comezo da feira, o encontro vén coa intención de bater récords: incrementáronse, con respecto do ano pasado, os postos de traballo ofertados (preto de 850), de empresas presentes (como dixemos, sobre 85) e de certificados (máis de 25).

PUBLICIDADE