8BitDo replica o mando da Nintendo 64

De cara ao lanzamento da consola Analogue 3D, que promete ser totalmente compatible cos xogos de Nintendo 64 grazas a emular o seu hardware mediante FPGA, dende 8BitDo prepararon uns mandos que replicaban os da clásica consola de Nintendo, que xa están dispoñibles para a súa compra e que, por fortuna, ao estar dotados de Bluetooth 5.0 e USB son compatibles con Nintendo Switch, Nintendo Switch 2, Windows e Android, polo que son bastante atractivos para nostálxicos.
Os mandos 8BitDo 64 non replican a estética dos mandos de Nintendo 64 (cos botóns no mesmo tamaño e na mesma posición), senón que tamén son un produto que convencerá a moitos pola súa robustez, xa que as pancas e gatillos contan con efecto hall (ou sexa, que non padecerán o temido drift que provoca o fallo da meirande parte de mandos de Switch).
Dende España poden adquirirse estes novos mandos a través de Amazon, onde están dispoñibles por 39,99 euros en cor branca e negra, sorprendendo o feito de que estean dispoñibles antes do lanzamento da Analogue 3D, pero este adiamento vén provocado polas incertezas do seu fabricante ante o impacto dos aranceis estadounidenses.