Nintendo recoñece que Mario xa non é fontaneiro

Aínda que nas últimas décadas sempre falamos do Mario de Nintendo como un fontaneiro, esa definición non parecía axustarse á realidade, xa que o personaxe creado por Shigeru Miyamoto tanto conduce karts, como xogo ao golf, practica o fútbol, loita contra monstros xigantescos ou incluso realiza diagnoses clínicas, actividades que non están precisamente asociadas á fontanaría, e, de feito, a profesión estaba ligada a un xogo en concreto, o Mario Bros. de recreativa (adaptado logo a máis plataformas) lanzado 1983 tras o éxito do Donkey Kong de 1981.
O propio Miyamoto recoñecera que no xogo de 1981 o personaxe era carpinteiro, polo que o feito de que logo traballase como fontaneiro co seu irmán Luigi parecía responder simplemente ás circunstancias, e precisamente iso é o que agora quixo deixar claro Nintendo na súa páxina web xaponesa, na que desligan a esta icona do mundo dos videoxogos a un oficio en concreto, mencionando que «parece que traballou como fontaneiro hai moito tempo».
Quédanos así claro que Mario non é un personaxe cunha biografía concreta, senón que muda en función das súas circunstancias, de xeito que tanto pode ser un traballador da construción como un doutor ou un deportista (tal e como recoñecera o seu creador nunha entrevista en 2010), que en calquera caso estará sempre disposto, de xeito altruísta, a salvar ao Reino Champiñón e á súa princesa das moitas ameazas ás que ten que enfrontarse.