Os Xogos con Gold de febreiro inclúen títulos representativos de épocas moi distintas

Microsoft anunciou os que serán os Xogos con Gold do mes de febreiro, e realmente son toda unha sorpresa, xa que ofrecen tanto un dos grande xogos exclusivos da compañía, Gears 5 (compatible con PC, Xbox One e Xbox Series X|S), senón tamén auténticas xoias das anteriores xeracións.
Cómpre salientar que a última entrega de Gears of War non só é un xogo impresionante que busca animar a moitos e conectar con esta saga, senón que tamén é un título optimizado para as novas consolas, o que é especialmente evidente no seu potente modo multixogador.
Poder gozar da versión para Xbox One da remasterización en alta definición de Resident Evil tamén é unha boa oportunidade, xa que para moitos será un primeiro acercamento ao título que marcou os pasos a seguir pola meirande parte de traballos no xénero dos survival horror.
Para completar os xogos de Xbox One temos Dandara: Trials of Fear Edition, un xogo de misterio que podemos describir como o título menos coñecido desta selección.
E cando imos ás consolas máis vellas chegan as meirandes sorpresas, xa que na primeira metade de febreiro teremos dispoñible Indiana Jones y la tumba del emperador, xogo de aventuras lanzado para a Xbox orixinal, e que grazas á retrocompatibilidade pode xogarse en Xbox One e Xbox Series X|S, destacando o feito de que conta con melloras para Xbox One X. A recuperación deste xogo de The Collective para LucasFilm é toda unha sorpresa porque ao ter unha vida tan curta a primeira Xbox son poucos os xogadores que chegaron a gozar deste título no seu día.
Outro título que tira proveito da retrocompatibilidade é Lost Planet 2, que podemos xogalo en Xbox One e Xbox Series X|S, e basicamente é un xogo de acción en terceira persoa que resulta atractivo para xogar con amigos.