O vindeiro 23 de xuño SEGA lanzará Sonic Origins, un novo recompilatorio que incluirá 4 xogos remasterizados do ourizo azul: Sonic the Hedgehog, Sonic CD, Sonic the Hedgehog 2 e Sonic 3 & Knuckles. Estes xogos poderanse así gozar en PC, PS4, PS5, Xbox One, Xbox Series X|S e Nintendo Switch, ou sexa, nas plataformas actuais. A edición estándar do produto terá un prezo de 39,99 euros, mentres que a edición dixital Deluxe que inclúe contidos adicionais venderase a 44,99 euros.
Sonic Origins permitirá gozar dos títulos clásicos de Sonic en alta definición con novas animacións para o inicio e o final de cada un dos xogos, permitindo tamén conseguir moedas ao completar misións e así poder desbloquear novo contido, desafíos e fases especiais no museo. Os xogos poden correr no seu Modo Clásico (coa resolución orixinal e un número limitado de vidas) ou no novo Modo Aniversario (con vidas infinitas e unha resolución mellorada a pantalla completa).
Tráiler de Sonic Origins
