Xbox estreará tenda de xogos para móbiles no verán

Nunha entrevista dentro do Bloomberg Technology Summit, a presidenta de Xbox, Sarah Bond, recoñeceu publicamente que Microsoft lanzará a súa propia tenda de xogos móbiles no mes de xullo como alternativa ás tendas de aplicacións de Google e Apple.
Cómpre lembrar que a través da adquisición de Activision Blizzard a compañía de Redmond tamén se fixo con King, de xeito que agora ten no seu catálogo xogos como Candy Crush, que xunto coas entregas móbiles de Minecraft e outros xogos tradicionais (como Call of Duty), conforma unha oferta de xogos móbiles que a través dunha tenda de aplicacións de seu tería unha maior flexibilidade para chegar ao público, evitando as limitacións impostas polas tendas de aplicacións móbiles actuais.
Inicialmente a nova tenda de xogos para móbiles de Microsoft verá a luz vía web, facilitando así o acceso aos xogos en calquera lugar, aínda que este será só o primeiro paso na construción dunha tenda de aplicacións de confianza (algo que actualmente poderán facer en Europa, pero que polo momento non poderían facer nos EE.UU.).