As TIC estarán presentes na aceleradora de economía social Xunta Impulsa

A directora xeral de Traballo Autónomo e Economía Social, Marta Mariño, visitou este venres 2 de xaneiro o Polo de emprendemento e apoio ao emprego de Vilanova de Arousa, onde destacou que este mes de xaneiro comezarán a asesorarse os 15 proxectos seleccionados no marco da aceleradora de economía social Xunta Impulsa, que acollerá precisamente o Polo arousán.
Trátase dunha iniciativa de formación e asesoramento que se completará con sesións de mentoring especializado e que está enmarcada no proxecto transfronteirizo ES-Factory, de cooperación Galicia–Norte de Portugal e co-financiado polo Fondo Europeo de Desenvolvemento Rexional (FEDER) no marco do programa Interreg VI A España – Portugal (POCTEP) 2021-2027.
Destacando a variedade das iniciativas elixidas, Mariño sinalou que proceden de toda Galicia e que predominan as do ámbito educativo ou cultural, así como as que dan protagonismo ao rural e á natureza no eido da produción agroalimentaria, da gastronomía, do ocio ou da cosmética. Tamén están representadas as TIC (Tecnoloxías da Información e a Comunicación), o deporte e o benestar.
Segundo apuntou a directora xeral, a aceleradora de economía social desenvolverase deica o mes de abril, tanto con sesións presenciais no Polo de emprendemento e apoio ao emprego de Vilanova de Arousa como con outras telemáticas, para culminar nun acto final de posta en valor dos proxectos e dos avances acadados grazas ás sinerxías xeradas entre as distintas persoas participantes.
A representante autonómica aproveitou a visita —na que tamén estivo o alcalde de Vilanova de Arousa, Gonzalo Durán— para poñer de relevo o labor do Polo vilanovés, salientando que, desde a súa posta en marcha en novembro de 2024, ten atendido uns 270 proxectos e promovido a creación de preto dunha vintena de empresas. Todo no marco das máis de 5.300 iniciativas asesoradas no conxunto dos 15 Polos repartidos por toda Galicia.
Así, o equipo técnico do centro vilanovés realizou unhas 650 sesións de titoría gratuítas e individualizadas co gallo de dar resposta ás persoas emprendedoras que acudiron ás instalacións (un 55 % delas, mulleres), adaptándose ás fases concretas dos seus proxectos. Nese senso, cómpre destacar que máis dun terzo se encontraba na fase de definición do modelo de negocio.