Insomniac Games aproveitou o panel Marvel”s Wolverine: Deep Cuts da San Diego Comic-Con para presentar un novo tráiler centrado na historia de Marvel: Lobezno e revelar novos detalles sobre os seus personaxes, faccións, música e contidos adicionais antes do lanzamento do xogo, previsto para o 15 de setembro de 2026 en PlayStation 5.
O novo avance sitúa a Logan nun momento de gran tensión emocional durante un encontro con Jean Grey, unha relación que se presenta como o eixo central da narrativa. Ambos os personaxes loitarán por protexer aos poucos mutantes que permanecen con vida nun mundo hostil, onde practicamente desapareceron os refuxios e organizacións capaces de defendelos.
A historia tamén introduce o Equipo X, unha unidade especial liderada por Nathaniel Essex e integrada por Mística, Dentes de Sable, o doutor Walter Langkowski e, anteriormente, o propio Logan. O grupo enfróntase aos plans de Trask para exterminar á especie mutante. Entre os inimigos tamén estarán os Colleitadores e a Man, organización xa adiantada nun avance publicado en xuño, á que agora se suma Dama Mortal como unha das principais antagonistas.
Durante o panel tamén se mostrou unha nova imaxe do xogo na que Logan combate contra membros da Man, unha facción coa que comparte un pasado que os xogadores descubrirán ao longo da aventura.
Insomniac confirmou ademais unha colaboración con Arc System Works para intercambiar contidos estéticos entre Marvel: Lobezno e Marvel Tōkon: Fighting Souls. O primeiro recibirá un traxe inspirado no título de loita, mentres que o segundo incorporará o traxe Battle Reborn de Marvel: Lobezno, que estará dispoñible gratuitamente para todos os xogadores a partir do 1 de setembro.
Outro dos anuncios foi a identidade do compositor principal da banda sonora. O encargado da música será David Fleming, gañador dun Emmy, que asina unha partitura dinámica adaptada á evolución das escenas e dos combates. Un primeiro tema xa pode escoitarse nas principais plataformas de música en continuo, mentres que a banda sonora completa publicarase o 28 de agosto de 2026.
Os asistentes ao panel tamén coñeceron a existencia dun cómic dixital que serve de precuela ao videoxogo. O guión corre a cargo do director narrativo de Insomniac Games, Walt Williams, e relata unha misión do Equipo X que axuda a contextualizar os acontecementos previos á historia principal. O cómic xa está dispoñible para a súa lectura a través de Marvel Unlimited como parte das promocións da San Diego Comic-Con.
Novo tráiler de Marvel: Lobezno
