Nintendo iniciou o exercicio fiscal 2027 cun descenso nas vendas da consola Switch 2 respecto ao extraordinario lanzamento rexistrado un ano antes, aínda que os resultados financeiros amosan un negocio sólido grazas ao bo comportamento do software, ao crecemento dos ingresos vinculados ás súas propiedades intelectuais e ao impacto favorable da devolución de aranceis nos Estados Unidos.
Durante o trimestre comprendido entre abril e xuño de 2026, Nintendo distribuíu 3,82 millóns de unidades de Switch 2, un 34,4 % menos que os 5,82 millóns vendidos no mesmo período do exercicio anterior, cando a consola acababa de chegar ao mercado. Pola súa parte, a primeira Switch reduciu as súas vendas un 31,8 %, ata as 660.000 unidades. A compañía nipoa subliña que a comparación está condicionada polo forte efecto do lanzamento inicial e asegura que a adopción da consola continúa sendo favorable en relación coa traxectoria seguida pola Switch orixinal.
A pesar desta desaceleración, Switch 2 acumula xa 23,68 millóns de consolas distribuídas desde a súa estrea, superando o ritmo de implantación da primeira Switch no mesmo punto do seu ciclo comercial. Nintendo tamén mantén sen cambios a previsión de vender 16,5 millóns de consolas durante o conxunto do actual exercicio fiscal, que remata en marzo de 2027, fronte aos 19,86 millóns comercializados no exercicio anterior.
Os resultados económicos melloraron de maneira notable. A facturación situouse en 517.800 millóns de iens, un 9,5 % menos interanual, pero o beneficio operativo disparouse un 150,5 %, ata os 142.500 millóns de iens, mentres que o beneficio neto aumentou un 53,5 %, alcanzando os 147.400 millóns de iens. Un dos factores que contribuíu a esta evolución foi a devolución duns 300 millóns de dólares correspondentes a aranceis estadounidenses aplicados anteriormente, contabilizados como unha redución do custo das vendas.
O software compensou parcialmente a menor demanda de hardware. As vendas de xogos para Switch 2 medraron un 9,2 % interanual, ata os 9,46 millóns de unidades, mentres que os títulos para Switch aumentaron un 38,6 %, con 33,81 millóns de copias distribuídas. O gran protagonista foi Tomodachi Life: Living the Dream, con 7,94 millóns de unidades no trimestre e máis de 8 millóns segundo as estimacións de vendas ao consumidor. Pokémon Pokopia tamén destacou con 1,27 millóns de copias vendidas fóra do Xapón.
Nintendo tamén resaltou o avance do negocio dixital. As vendas por esta vía creceron un 90 %, ata os 132.700 millóns de iens, representando xa o 61,5 % da facturación total de software, 2,2 puntos máis que un ano antes.
Outro dos motores do trimestre foi a explotación das propiedades intelectuais. Os ingresos relacionados con películas, vídeos, licenzas e mercadotecnia aumentaron un 107,4 %, impulsados principalmente polo éxito de The Super Mario Galaxy Movie, que superou os 1.000 millóns de dólares de recadación mundial e converteuse na segunda adaptación cinematográfica dun videoxogo con maior recadación da historia, só por detrás da anterior película protagonizada por Mario.
A compañía recoñece, con todo, que afronta varios desafíos para os vindeiros meses. Entre eles figuran o incremento do custo dos compoñentes, especialmente da memoria, e o impacto das medidas arancelarias, factores que xa incorpora nas súas previsións cun efecto estimado de arredor de 100.000 millóns de iens sobre o custo das vendas.
No plano comercial, Nintendo prepara un intenso calendario de lanzamentos para reforzar a base instalada de Switch 2. Entre os títulos previstos figuran Fire Emblem: Fortune’s Weave en setembro, Nintendo Switch Sports Resort en outubro, un remake de The Legend of Zelda: Ocarina of Time antes de rematar o ano e, xa para 2027, Xenoblade Genesis, Pokémon Winds e Pokémon Waves.
