A tecnolóxica galega Balidea participa en Step2Had, un proxecto de investigación e innovación que aposta pola intelixencia artificial e as tecnoloxías dixitais para mellorar a atención sanitaria no domicilio.
No marco desta iniciativa, a firma con sede principal en Santiago lidera o desenvolvemento dun axente de intelixencia artificial orientado ao apoio á decisión clínica, co-deseñado coa Unidade de Hospitalización a Domicilio do Servizo Galego de Saúde (SERGAS).
O obxectivo é “facilitar o traballo dos profesionais sanitarios, mellorar o seguimento dos pacientes e contribuír á detección temperá de posibles situacións de risco”.
O proxecto reúne a Balidea, DomusVi, Insati, ISECO by Sensio e Carelife, que achegan os seus coñecementos en intelixencia artificial, monitoraxe remota, medicina preditiva e atención sociosanitaria. As solucións avaliaranse en contornas reais para analizar a súa viabilidade e o seu potencial impacto asistencial.
O proxecto Step2Had está financiado polo Centro para o Desenvolvemento Tecnolóxico e a Innovación (CDTI), a través do programa Innterconecta STEP 2025, con Fondos FEDER 2021-2027.
Con esta iniciativa, Balidea reforza o seu compromiso coa innovación tecnolóxica e o desenvolvemento de solucións dixitais que contribúan a unha atención sanitaria máis conectada, eficiente e centrada nas persoas.
