O Colexio Oficial de Enxeñeiros Técnicos de Telecomunicación de Galicia (COETTGA) presentou en Vigo os resultados dun estudo de campo que percorreu uns 6.000 quilómetros polas principais vías de comunicación galegas para medir a cobertura móbil real durante os desprazamentos.
A investigación, realizada este ano pola AGGETT e o COETTGA co apoio da Axencia para a Modernización Tecnolóxica de Galicia (AMTEGA), dá prioridade ás conexións en movemento e á calidade do servizo ofrecido polas operadoras que dispoñen de infraestrutura propia. As medicións permiten identificar zonas con deficiencias de cobertura e avaliar o cumprimento dos obxectivos europeos de conectividade.
O estudo preséntase na xornada técnica DriveTest Galicia 5G, que abre o VII ForoTelecos Galicia no Palacio da Oliva, en Vigo. As probas reais de drive test permiten analizar a experiencia dos usuarios e comprobar o funcionamento das redes móbiles ao longo dos percorridos por estrada e ferrocarril.
A Comisión Europea estableceu en 2016 o obxectivo de acadar para 2025 unha cobertura 5G ininterrompida nas principais vías de transporte terrestre. Para 2030, a Unión Europea fixou como meta dispoñer de redes sen fíos de alta velocidade en todas as zonas poboadas, cun rendemento equivalente, como mínimo, ao do 5G.
«Este ano percorremos uns 6.000 km con equipos de medida para saber algo que lle importa a calquera: se o móbil funcionará cando máis o necesite. Cando unha rede funciona, ninguén se acorda dela; cando falla, nótase nunha urxencia, nunha ambulancia ou nunha viaxe. Por iso medimos e por iso publicaremos os datos en aberto», explica José Manuel Martínez Pérez, decano do COETTGA.
A programación do foro completouse coa entrega dos Premios Enxeño 2026, na que se deron a coñecer os galardoados da presente edición.
