The Force Unleashed non terá versión para PC polas súas esixencias gráficas

O último xogo inspirado en Star Wars, The Force Unleashed, non chegará ata setembro para PS2, PS3, PSP, Xbox 360, Nintendo DS, Wii e mesmo para algún móbil, pero desta volta non contará con versión para ordenadores persoais, o que finalmente xustificou o produtor do xogo, Cameron Suey, nunha entrevista para VideoGamer.com, na que asegurou que «se facemos o xogo para equipos de alta gama alguén cun PC de baixas prestacións tería unha mala experiencia de xogo. Debería ter que configurar os gráficos con pouco nivel de detalle e iso non sería o mesmo xogo», o que é unha desculpa que realmente sorprende, pois un agardaría alusións á piratería para PC ou aos altos custos do desenvolvemento da versión, pero non ás dificultades de atender a equipos pouco potentes (especialmente se pensamos que o xogo incluso contará con versións portátiles).
Unha mágoa que os usuarios que conten con equipos informáticos destinados a o uso de xogos non poidan gozar dun xogo da saga que xa deu moitas entregas de grande calidade no pasado.