Xa está á venda Final Fantasy VII: Crisis Core para PSP

Hoxe chegou ás tendas españolas o agardado xogo para PSP Final Fantasy VII: Crisis Core, que é un novo título de Square Enix que se desenvolve no marco do clásico Final Fantasy VII que saíra para a vella consola PlayStation (lembremos que Final Fantasy é a franquicia de videoxogos máis importante despois de Mario, Pokémon e os Sims).
A trama que rodea o xogo é unha especie de precuela do título para PlayStation (está situado 7 anos antes), aínda que para comprender toda a trama é preciso coñecer ben o xogo orixinal e a película de animación Advent Children (ambientada tamén no mesmo universo, considerado como o mellor de todos os que creou a saga de Final Fantasy). De todos os xeitos, comprender completamente o argumento do xogo (algo reservado para os seguidores máis fieis da saga) non é preciso para gozar do mesmo.
Esta nova entrega presenta uns gráficos moi elaborados (demostrando do que a PSP é capaz) e presenta un sistema de combate innovador dentro deste tipo de xogos, que estarían englobados no xénero dos RPG.
O prezo de Final Fantasy VII: Crisis Core é de 39,95 euros na súa edición estándar, existindo tamén unha edición de coleccionista que inclúe un libro de ilustracións de 48 páxinas da que se descoñece cando chegará ás tendas españolas.