A velocidade media de acceso á Rede por banda larga en España é de 3,59 Mbps

Dende o portal ADSL Net realizan constantemente unha análise da velocidade real que dan as conexións de banda larga en España, que se situaría nos 3,59 Mbps de media cunha eficiencia media do 66,3% (moi lonxe do 80% que pretende o Goberno que se garanta), supondo así unha lixeira melloría nos dous factores analizados fronte ao mes de xaneiro (mellorando un 4,9% a velocidade media e un 2% o rendemento das liñas).
Estes datos indicarían que as liñas de banda larga en España van mellorando, o que se nota especialmente nas conexións de máis velocidade (nas que unha pequena mellora de eficiencia incrementa notablemente a velocidade global acadada).
Cómpre destacar que finalmente o paso de 1 Mbps a 3 Mbps nas conexións ADSL está completado, pois as liñas de 1 Mbps xa son moi pouco significativas, e en breve volveremos a gozar doutra duplicación de velocidade, de xeito que para o ano que vén deberiamos estar a falar de velocidades medias duns 6 Mbps (comezando o proceso de aumento de velocidade no mes de setembro).