34 concellos galegos carecían de liñas de banda larga no 2007

O Anuario Económico de 2008 publicado por La Caixa inclúe coma indicador o número de liñas de banda larga por localidades, e no caso galego dende Galicia Profunda denuncian que a situación é alarmante, xa que se detecta que non só estamos á cola de España na penetración da banda larga, senón que 34 concellos galego carecen de liñas deste tipo.
Aínda que o Plan de Extensión da Banda Larga (PEBA) sosteña que antes do final do presente ano a cobertura da banda larga vai chegar ao 99% parece algo difícil, se temos en conta que as vilas de Frades, Mesía, Santiso, Toques, Os Blancos, Castrelo do Val, Entrimo, O Irixo, Laza, Manzaneda, A Mezquita, Muíños, As Nogais, Porqueira, Rairiz de Veiga, Ramirás, Toén, A Veiga, Vilardevós, Xunqueira de Espadanedo, Baleira, Cervantes, Folgodo do Courel, Friol, Guntín, O Incio, Navia de Suarna, Pedrafita do Cebreiro, Samos, Trabada, Agolada, Dozón, Pazo de Borbén e Rodeiro carecen de conexións deste tipo, mentres que O Bolo, Calvos de Randín, Lobeira, Sobrado, As Somozas e Taboadela só contan con 1 conexión de banda larga e Monfero, Mazaricos, San Amaro e Santiso chegan ás 2.
Se ben en moitos casos se pode argumentar que a poboación dos concellos é moi reducida (e espallada), nalgúns dos casos mencionados estamos a falar de vilas con varios milleiros de habitantes, polo que é de agardar que exista a demanda da banda larga, pero a carencia de infraestruturas axeitadas fagan que a fenda dixital se resista a reducirse en Galicia.