Presentan novas imaxes do Street Fighter IV no Tokyo Game Show

O Street Fighter IV debería chegar ao mercado antes de rematar o ano (aínda que podería demorarse a febreiro de 2009), polo que os usuarios de Xbox 360, PS3 e PC poderán gozar desta nova entrega da saga de xogos de loita de máis sona, e para ir abrindo boca no Tokyo Game Show presentaron novas imaxes do xogo e un novo trailer (con sorpresa final incluída).
O xogo, que xa se pode ver na súa versión para máquinas recreativas, será moi espectacular, conservando a mecánica de xogo 2D pero cuns gráficos renderizados en 3D, dando unha aparencia impresionante a personaxes clásicos coma Ryu, Ken, Chun-Li, Zangief, Blanka ou Guile, aos que se xuntarán novos personaxes coma Crimson Viper, El Fuerte e Rufus, presentándose hoxe mesmo imaxes de Akuma e Sakura en movemento, polo que Street Fighter IV está cada vez máis preto de ser real.
A nova entrega parece recuperar a dureza e violencia do xogo orixinal e virá acompañado por escenas cinemáticas con aparencia de serie de animación xaponesa (non esquezamos que o xogo xa deu lugar a películas e series de animación na súa longa vida). Parece que teremos un forte regreso desta saga que podería ter un longo percorrido nas consolas de nova xeración.

O espectacular novo trailer presentado no Tokyo Game Show