O director artístico de Fable II presenta o videoxogo en Barcelona

O vindeiro día 31 de outubro, no marco do XIV Salón do Manga de Barcelona, vai ter lugar a presentación do videoxogo Fable II exclusivo para Xbox 360, a obra cumio do creador de videoxogos Peter Molyneux, considerado un visionario da creación audiovisual interactiva.
A presentación virá da man do reputado director artístico Ian Lovett, encargado de definir o deseño visual do mundo de Fable.
O acto terá lugar no Salón de actos de La Farga en L´Hospitalet de Llobregat ás 18:00 horas, e nel, os responsables mostrarán o funcionamento desta aplicación ambientada 500 anos despois do orixinal.
Como anécdota, o xogo conta cun dos sistemas de intelixencia artificial máis avanzados do mundo, grazas aos complexos algoritmos que permiten modificar constantemente as reaccións dos personaxes que poblan o mundo, así como xestionar o comportamento do can que acompaña ao heroe da aventura.